नयाँ नक्सा समेटेको विधेयक खारेज गर्न सरिता गिरीको संसोधन प्रस्ताव, फिर्ता लिन पार्टीको चेतावनी
प्रकाशित मिति : जेष्ठ २८, २०७७ बुधबार
समाजवादी पार्टीकी सांसद सरिता गिरीले नयाँ नक्सा समेटेको नेपालको संविधान दोस्रो संशोधन विधेयक खारेज गर्न माग गर्दै बुधबार संशोधन प्रस्ताव संसदमा दर्ता गराएपछि उनलाई सो प्रस्ताव फिर्ता लिन चेतावनी दिइएको छ ।
मंगलबार संविधान संशोधनसम्बन्धी विषयमा सबै दलले सैद्धान्तिक सहमति जनाएकोमा बुधबार गिरीले संसदमा रहेको संविधान संशोधन प्रस्तावलाई खारेज गर्न माग गर्दै अर्को संशोधन प्रस्ताव संसदमा दर्ता गराएकी थिइन् ।
उनको प्रस्तावको तीव्र विरोध भइरहेको बेला समाजवादी पार्टीले गिरीलाई व्यक्तिगत रुपमा दर्ता गरेको संविधान संशोधन प्रस्ताव फिर्ता लिन निर्देशन दिएको छ ।
बुधबार पार्टीका प्रमुख सचेतक उमाशंकर अरगरियाले विज्ञप्ति जारी गर्दै गिरीलाई संशोधन प्रस्ताव फिर्ता लिन निर्देशन दिएका हुन् । प्रस्ताव फिर्ता नलिए कारबाही गर्ने चेतावनी समेत दिइएको छ ।
‘उपरोक्त सम्बन्धमा संघीय संसदमा दर्ता भएको नेपालको संविधानको दोस्रो संशोधनमा तपाईले संसदीय दलको निर्देशन बिना मिति २०७७ २ २८ गते संशोधन हालेको हुँदा उक्त संशोधन तुरुन्त फिर्ता लिनुहुन निर्देशन गरिन्छ’, विज्ञप्तिमा भनिएको छ, ‘साथै निर्देशन पालना नगरेमा तपाईंलाई पार्टीले कारबाही गर्न बाध्य हुने व्यहोरा जानकारी गराइन्छ।’