अमेरिकामा रहेका काँग्रेस नेताबीच झण्डै हात हालाहाल
प्रकाशित मिति : चैत्र २८, २०७३ सोमबार
-अनिल अधिकारी
जुङगाको लडाईको चेपुवामा रहेको नेपाली काँग्रेस सम्बद्ध जनसम्पर्क समिति अमेरिको विवाद आइतवारको एक सार्वजनिक कार्यक्रममा छताछुल्ल भएको छ । नेपाली कांग्रेसको सुभेच्छुक संगठन जनसम्पर्क समितिका वर्तमान सभापति आनन्द विष्ट र पूर्व संयोजक विस्नु सुवेदीका बिचको भाषणले झण्डै हात हालाहालको स्थिति सृजना भयो ।
कार्यक्रम थियो नेपाली कांग्रेसका नेता तथा पूर्व मन्त्री रेवती भुषालको स्वागतार्थ आयोजित कार्यक्रम तर विष्ट र सुवेदीका बिचमा संगठनको विवादको भाषण हुँदा यस्तो स्थिति आएको हो ।
आनन्द विष्टले भाषण गरिसकेपछि कार्यक्रममा आईपुगेका पूर्व संयोजक सुवेदीले भाषण गदै गर्दा फ्लोरबाट सुवेदीलाई भाषण रोक्न भनियो । सुवेदीले भाषण सकाए लगत्तै विष्टले मञ्चबाटै जवाफ फर्काए, अनि सुरु भयो दुवै पक्षका कार्यकर्ता बिचमा भनाभन ।
संगठनको निति भन्दा बाहिर गएर जनसम्पर्क समितिलाई सामाजिक संस्था जस्तै बनाउन खोजेको आरोप पूर्व संयोजक सुवेदीले लगाए भने संगठनको नियम अनुुसार नै आफुले साधारण सभाको आयोजना गरेको र विवाद भए त्यही आएर छलफल गर्न विष्टले चुनौती दिए ।
कार्यक्रमका प्रमुख अतिथि रहेका पूर्व मन्त्री भुषाल बोल्नु भन्दा केही मिनेट अघि मात्रै यस्तो विवाद भयो, सभापति विष्ट र पूर्व संयोजक सुवेदीका बिचमा विवादले चरम रुप लिएपछि वर्तमान महासचिव मुनेन्द्र नेम्वाङ दुवै नेतालाई नबोल्न भन्दै विवाद मिलाउन सक्रिय देखिन्थे ।
मञ्चमा रहेका पूर्व मन्त्री भुषाल, अधिवक्ता खगेन्द्र जिसि लगायतका अतिथि टुलुटुलु हेरेर बस्न बाध्य थिए भने कार्यक्रममा पुगेका करिव पचासको सख्यामा रहेका अन्य नेता तथा कार्यकर्ता जुङगाको लडाईको हेरिरहेका थिए ।
सँधै संस्थापन र देउवा पक्षका बिचमा चिरा पर्ने नेपाली कांग्रेसको रोगले जनसम्पर्क समिति अमेरिकाको विवाद सार्वजनिक कार्यक्रममै छताछुल्ल हुन थलेको छ ।
नेताहरु, आफुलाई संस्थापन ठहर गर्ने पूर्व संयोजक बिस्नु सुवेदी र देउवा पक्षको भनिने सभापति आनन्द विष्टका बिचमा विवाद हुँदा दुवै पक्षले आआफ्नो ढंगले भर्जिनिया र न्यूर्योकमा भेलाको आयोजना गर्दैछन् ।
दुवै नेताले आफुलाई पार्टीबाट सहयोग रहेको, आफ्नो भेलामा केन्द्रीय स्तरका नेता आउने र आफ्नो भेला नै आधिकारिक भन्छन् ।