चीनको सरकारलाई सहयोग गर्नेगरी अमेरिकामा पढ्न आउन प्रतिबन्ध
प्रकाशित मिति : जेष्ठ १७, २०७७ शनिबार
चीन सरकारको सैन्य नागरिक समायोजन रणनीतिमा सहयोग गर्नेगरी अमेरिकामा अध्ययनका लागि आउन अमेरिकी सरकारले जुन १ देखि प्रतिबन्धको घोषणा गरेको छ । अमेरिकी राष्ट्रपति डोनाल्ड ट्रम्पले एक आदेश जारी गर्दै चीनको सरकारलाई सहयोग गर्नेगरी पढ्न आउने चीनका विद्यार्थीहरुको अमेरिका प्रवेशमा रोक लगाएका हुन् ।
यदि एफ वा जे भिसामा आउन चाहने चीनका विद्यार्थीहरुको सम्बन्ध चीनिया सरकारको सैन्य नागरिक समायोजन एमसीएफको रणनीतिलाई समर्थन गर्ने संस्थाहरुसँग भएको खण्डमा उनीहरुलाई अमेरिकामा अध्ययनमा प्रतिबन्ध लगाइने भएको छ । स्नातक भन्दा तलको अध्ययन गर्न आउनेहरु, अमेरिकी ग्रिनकार्डवाहकहरु, अमेरिकी नागरिक वा ग्रिनकार्डवाहकका दम्पत्तिहरुलाई भने यस्तो प्रतिबन्ध लाग्नेछैन ।
राष्ट्रपतिको घोषणाको पूर्ण पाठ यहाँ पढ्नुहोला ।
त्यस्तै चीन सरकारको सैन्य नागरिक समायोजन रणनीति एमसीएफलाई समर्थन नगर्ने वा सम्बन्धित नभएको अध्ययन वा शोधका लागि पनि विद्यार्थीहरुलाई प्रतिबन्ध लगाइने छैन । यसबारे अमेरिकी सरकारकाले डिपार्टमेन्ट अफ स्टेट र होमल्याण्ड सेक्युरिटीले स्पष्ट निर्देशिका जारी गर्ने अपेक्षा गरिएको छ ।
चीनले आफ्नो सैन्य नागरिक फ्युजन कार्यक्रम अन्तरगत कैयन विद्यार्थीहरुलाई अमेरिकामा आएर अध्ययन वा रिसर्चका लागि सघाउने गरेको छ । जसअन्तरगत उनीहरु अमेरिकामा अध्ययन र रिसर्च सकेपछि चीन सरकारको सैन्य क्षमता बढाउनमा आफ्नो ज्ञान, सिप र प्रविधिको प्रयोग गर्छन् ।
अमेरिकामा पहिले नै एफा वा जे भिसामा आएर त्यस्तो अध्ययन वा रिसर्चमा लागिरहेकाहरुको भिसा खारेज गर्ने वा नगर्ने सम्बन्धमा पुनरावलोकन गर्न अमेरिकी विदेशमन्त्रालयलाई आदेश दिइएको छ । चीनबाट अमेरिकाको प्रविधि र बौद्धिक सम्पत्तिको अधिग्रहण रोक्न ६० दिनभित्र अन्य आप्रवासी र गैरआप्रवासी मापदण्ड बनाउन राष्ट्रपति डोनाल्ड ट्रम्पले सम्बन्धित निकायहरुलाई निर्देशन समेत दिएका छन् ।