जात नमिल्ने भन्दै गाउँलेहरुको कुटाईबाट नवराज बिक को मृत्यु
प्रकाशित मिति : जेष्ठ ११, २०७७ आईतबार
जाजरकोट ।
रुकुमपश्चिम चौरजहारी नगरपालिका–८ सोतीस्थित गाउँलेहरुको कुटाइबाट जाजरकोट भेरी नगरपालिका–४ रानागाउँका नवराज विकको मृत्यु भएको छ ।
नवराज र सोतीस्थित सुष्मा मल्लबीच लामो समयदेखि प्रेम रहेको थियो । सुष्माकै आग्रहमा नवराजले १९ युवा जाजरकोटबाट शनिबार बेलुकी सोती लिएर गएका थिए ।
केटाहरु आएको खबर सुष्माकी आमाले थाहा पाएर हल्ला गरेपछि गाउँलेहरुले युवालाई कुटपिट गर्दा नवराजको मृत्यु भएको प्रनाउ श्रेष्ठले जानकारी दिए । गाउँलेहरुले लखेट्दा अन्य छ युवा बेपत्ता रहेको उनको भनाइ छ । उजुरी दिएपछि दुवै समूहबीच छलफलसमेत भएको थियो । जात नमिल्ने भन्दै चर्को रूपमा यो प्रेमलाई अस्वीकार गरिएको केही तथ्यले थाहा हुन आएको प्रहरीको भनाइ छ ।
सुष्मा र नवराजबीच प्रेम रहेको थाहा पाएपछि आफन्तले सो विवाह हुन नदिन चौरजहारी प्रहरी कार्यालयमा केही समयअघि उजुरीसमेत दिएको श्रेष्ठले जानकारी दिए ।नवराजसँग गएका छ युवा अझै बेपत्ता रहेको जाजरकोटका प्रहरी नायब उपरीक्षक किशोर श्रेष्ठले जानकारी दिए । १२ युवालाई चौरजहारीस्थित प्रहरीले पक्राउ गरेको छ ।
लामो समय देखी सामाजिक न्याय का पक्षमा पैरवी गर्दै आएका पत्रकार एवं लेखक शिवहरि ज्ञवालीका अनुसार गैरदलित युवतीसँगको अन्तरजातीय प्रेम सम्बन्धका कारण गत शनिबार राति रुकुमपश्चिम चौरजहारी नगरपालिका–८ सोतीमा जाजरकोट भेरी नगरपालिका–४ रानागाउँका नवराज विकको मृत्यु भएको खबरले एकसाथ आहात, विक्षिप्त र आक्रोशित बनाएको छ । नबराजसँगै अरु ६ जना युवाहरुलाई अझै गैरदलितहरुले बेपत्ता बनाएका छन् । सोतीकी सुष्मा मल्लसँग नवराजको लामो समयदेखि प्रेमसम्बन्ध थियो । सुष्माकै आग्रहमा नवराज १९ जना युवा लिएर जाजरकोट पुगेका थिए । जात नमिल्ने भन्दै यसअघि नै नवराजविरुद्ध प्रहरीमा उजुरी समेत गरिएको थियो । घटनाका दोषिहरुलाई हदैसम्मको कारवाही गरियोस। तर, सन् २०११ मा जातीय भेदभाव तथा छूवाछूत कसुर तथा सजाय ऐन लागू भइसकेपछि अन्तरजातीय विवाह र प्रेम सम्बन्धका कारण गैरदलित समुदायबाट हत्या गरिएका काभ्रेका अजित मिजार,सप्तरीका शिवशंकर दास, दैलेखका सेते दमाई, झापाकी अस्मिता तोलामी सार्की, तनहुँकी संगीता परियार, सिन्धुपाल्चोककी माया तिरुवा र म्याग्दीकी सविता नेपालीको घटनामा राज्यले दोषिलाई कुनै पनि किसिमको कारवाही नगरेको हुँदा यो देशमा सबै दलित समुदायको ज्यान नै जोखिममा रहेको महसुस भएको छ । उनले अपराधीलाई कडा कारवाहीको माग समेत गरेका छन।