ट्रम्पको आगामी निशानामा अन्तर्राष्ट्रिय विद्यार्थी, ओपीटीमा कडाईको तयारी
प्रकाशित मिति : बैशाख २३, २०७७ मंगलबार
ट्रम्प प्रशासनले आगामी निशाना अमेरिकामा रहेका अन्तर्राष्ट्रिय विद्यार्थीहरुलाई बनाउने तयारी गरेको छ । पढाईसकेपछि अमेरिकामा ओपीटीमा काम गर्न चाहने विद्यार्थीहरुका लागि कडाई गर्ने योजनामा ट्रम्प प्रशासन रहेको छ ।
गत अप्रिल २२ मा अमेरिकी राष्ट्रपति डोनाल्ड ट्रम्पले ६० दिन आप्रवासन रोक्ने आदेश जारी गर्दा गैरआप्रवासी भिसा वाहकका सन्दर्भमा ३० दिनभित्र पुनरावलोकन गरेर सिफारिस गर्न आफ्नो प्रशासनलाई आदेश दिएका थिए । मे महिनाभरमा ट्रम्पले गैरआप्रवासी भिसाका सन्दर्भमा कडाईका सन्दर्भमा नयाँ नियम घोषणा गर्नसक्ने जनाइएको छ ।
गत अप्रिल २७ मा होमल्याण्ड सेक्युरिटीका उच्च अधिकारी चाड उल्फले ट्रम्प प्रशासनको आगामी निशाना ओपीटी कार्यक्रम हुनसक्नेतर्फ संकेत गरेका थिए । केही भिसा कार्यक्रमहरु विगतमा दुरुपयोग गरिएको र ओपीटी कार्यक्रम कैयन चिनिया विद्यार्थीहरुले उपयोग गरिरहेकाले यसबारे डिपार्टमेन्टले प्राथमिकताका साथ हेरिरहेको उनले बताएका थिए ।
अहिले ट्रम्प प्रशासनका अध्यागमन नीतिका मुख्य योजनाकार स्टेफन मिलर तिनै व्यक्ति हुन् जसले विगतमा सिनेटरहरु जेफ सेसन र टेड क्रुजलाई ओपीटी कार्यक्रम खारेज गर्ने बिलको ड्राफ्ट बनाउन सहयोग गरेका थिए । उक्त बिलमा ओपीटी कार्यक्रम खारेजीमात्र होइन, अमेरिकामा उच्च शिक्षा लिएका अन्तर्राष्ट्रिय विद्यार्थीहरुलाई कम्तीमा १० बर्ष विदेशमा काम नगरेसम्म अमेरिकामा कामका लागि निषेध गर्ने विषय उल्लेख रहेको थियो ।
ट्रम्पको कार्यकालको अवधिमा विज्ञान, प्रविधि, इन्जिनियरिङ र गणितको स्टीम ओपीटी सहित ओपीटी कार्यक्रमको खारेजी वा कडाई नियमक एजेण्डा रहदै आएको छ । ओपीटीले पढाईसकिएपछि अमेरिकामा अन्तर्राष्ट्रिय विद्यार्थीलाई १२ महिना कामगर्न अनुमति प्रदान गर्छ भने स्टीम ओपीटी अन्तरगत थप २४ महिना काम गर्न सकिने प्रावधान रहेको छ ।
ट्रम्प प्रशासनले यसअगाडि अन्तर्राष्ट्रिय विद्यार्थीहरुलाई भिसामा प्रदान गरिदै आएको डीएस स्टाटस खारेज गर्ने विषयमा प्रस्ताव ल्याउने योजना बनाइसकेको छ । यद्यपी ट्रम्प प्रशासनका लागि ओपीटीमा कडाई गर्न वा खारेजीका लागि चुनौतीको भने सामना गर्नुपर्ने देखिन्छ ।