डेलिगेट भण्डारीको पहलमा न्युयोर्कका ५ नेपालीको शव समयमै र सस्तोमा दाहसंस्कार
प्रकाशित मिति : बैशाख २३, २०७७ मंगलबार
मेरिल्याण्ड राज्यको संसदमा प्रतिनिधित्व गर्ने नेपाली मुलका ह्यारी भण्डारीको पहलमा न्युयोर्कमा ५ जना नेपालीको शव समयमै र सस्तोमा दाहसंस्कार सम्भव भएको छ । शव दाहसंस्कारका लागि पालो पाउन समेत मुस्किल रहेको र शुल्क समेत चर्को लिने गरेको अवस्थामा भण्डारीको पहलमा सस्तो शुल्कमा दाहसंस्कार सम्भव भएको छ ।
न्युयोर्कमा ज्यान गुमाएका अनिल लिम्बु, निमा शेर्पा र अजय छोंचुको शव भण्डारीको पहलमा फस्ट एभिन्यु फ्युनेरलमा भारी डिस्काउन्टमा दाहसंस्कारको व्यवस्था सम्भव भएको छ । भण्डारीको पहलमा झण्डै ५० प्रतिशत छुटमा दाहसंस्कार संभव भएको छ । उहाँहरुको दाहसंस्कार झण्डै १२ डलरदेखि देखि १४ सय डलरको खर्चमा गराउन सकिएको भण्डारीले जानकारी दिनुभयो ।
त्यस्तै बिष्णु कुमार राई र पवन मल्लको शव पनि भण्डारीकै पहलमा न्युजर्सीको रुबी मेमोरियल फ्युनेरल एण्ड क्रिमेशन सर्भिसमा समयमै र भारी छुटमा सम्पन्न भएको छ । भण्डारीले पहल गरेका कारण हरेकको दाहसंस्कारमा १३९६ डलर छुट गरिएको थियो । दाहसंस्कारका लागि एकजनाको १५ सय डलरको दरले शुल्क लागेकोमा उक्त शुल्क पनि भण्डारीकै पहलमा बाल्टिमोरको गैर नाफामुलक संस्थाले बेहोरेको छ । प्रकाश शरदको गैरनाफामुलक संस्था फ्रेण्डस अफ स्पार्चले दाहसंस्कारको शुल्क बेहोरेको हो ।
त्यस्तै राजकुमार थापाको दाहसंस्कारका परिवारका सदस्यहरुलाई सम्पर्कमा ल्याउनेदेखि उचित तरिकाले दाहसंस्कार गर्नेमा भण्डारीले सहयोग गर्नुभएको थियो । उहाँको सहयोगमा थापाका क्यालिफोर्नियामा रहेका परिवारका निकट सदस्यहरुले अस्तुसमेत प्राप्त गरिसकेका छन् ।
डेलिगेट भण्डारीकै मुख्य पहलका कारण बिष्णुकुमार राईको शव बेवारिसे भएर सामुहिक चिहानमा जानबाट रोकिएको थियो । राईका परिवारका सदस्यहरु कोहीपनि अमेरिकामा नभएका कारण र नेपालमा समेत नजिकको नातेदारमा भान्जीमात्र रहेकाले झण्डै तीनसातासम्म शव दावी हुन सकेको थिएन । तरपछि न्युयोर्कका सामाजिक व्यक्तित्व केशवराम राई लगायतको पहलमा परिवारका सदस्यहरुलाई सम्पर्कमा ल्याएर सम्मानपूर्वक राईको दाहसंस्कार गरिएको थियो ।