न्युजर्सी निवासी ५० बर्षका नेपाली कोरोना संक्रमणपछि अस्पताल भर्ना
प्रकाशित मिति : चैत्र २१, २०७६ शुक्रबार
न्युजर्सीको किपोर्टमा बस्दै आएका ५० बर्षका एकजना नेपालीमा कोरोना संक्रमण पुष्टी भएपछि अस्पतालमा भर्ना गरिएको छ । न्युजर्सीमा नेपालीमा कोरोना संक्रमण पुष्टी भएको सार्वजनिक भएको यो नै पहिलो हो ।
न्युजर्सीको हजलेटमा ग्यास स्टेशनमा काम गर्दै आएका ती नेपाली अरु तीनजना नेपालीसँगै अपार्टमेन्टमा बस्दै आएका थिए । आफूलाई कोरोनाको संक्रमण पुष्टी भएकोबारे ग्यास स्टेशनका संचालकलाई जानकारी दिइसकेको संक्रमित नेपालीले बताएका छन् ।
कोरोना संक्रमणको लक्षण देखिएपछि अस्पताल गएका ती नेपालीमा आज विहान कोरोना संक्रमण पुष्टी भएको हो । त्यसपछि उनलाई अस्पतालमा नै भर्ना गरिएको छ । स्थीति सामान्य रहेका व्यक्ति पनि तत्कालै गम्भिर बनेका उदाहरण भएकाले उनलाई कहिले डिस्चार्ज गरिने भन्नेबारे केही बताउन नसकिने अस्पतालले जनाएको छ ।
ती नेपालीमा स्वासप्रश्वासको समस्या नदेखिएको र ज्वरो लगायतका लक्षणहरु देखिएको अस्पतालले जनाएको छ ।
अस्पताल श्रोतले भन्यो – ‘भर्ना भएका बिरामीको अवस्था सामान्य नै छ । भर्ना भएका अरुका तुलनामा उनको अवस्था राम्रो रहेको छ । अहिले उनलाई विभिन्न औषधीहरु चलाइएको छ । केहीदिनको उपचारपछि कहिले डिस्चार्ज गर्ने भन्ने टुंगो लाग्नेछ ।’
अमेरिकाको न्युयोर्क र न्युजर्सीमा कोरोना संक्रमितको संख्या झण्डै १ लाख ३५ हजार पुगेको छ । न्युयोर्कपछि कोरोना संक्रमितहरु न्युजर्सीमा रहेका छन् । न्युयोर्कमा दर्जनौं नेपाली परिवारमा कोरोना संक्रमण पुष्टी भएपनि न्युजर्सीका नेपालीका केसहरु भने अहिलेसम्म सार्वजनिक भएका छैनन् ।
न्युयोर्कमा अहिलेसम्म २ लाख ६० हजारको परीक्षण गरिएकोमा झण्डै ४० प्रतिशत अर्थात् झण्डै १ लाख ३ हजारमा संक्रमण पुष्टी भएको छ ।