सेल्फ इम्प्लोयडले न्युयोर्कमा यसरी आवेदन दिनुहोस् वेरोजगारी सुविधा
प्रकाशित मिति : चैत्र १९, २०७६ बुधबार
यदि तपाई सेल्फ इम्प्लोयड हुनुहुन्छ भने पनि कोरोनाको महामारीबाट तपाई प्रभावित भएको खण्डमा तपाईले वेरोजगारी इन्सुरेन्सका लागि फाइल गर्न सक्नुहुनेछ । तपाईले पनि राज्यबाट प्राप्त हुने सुविधा र संघीय रुपमा प्राप्त हुने साप्ताहिक ६ सय डलरको सुविधा प्राप्त गर्न सक्नुहुनेछ ।
त्यसका लागि तपाईले फर्म भर्दा केही सावधानीहरु अपनाउन न्युयोर्क राज्यको डिपार्टमेन्ट अफ लेवरले सुझाव दिएको छ । विशषेगरी फर्ममा रहेका ७ वटाप्रश्नबारे तपाईले दिने जवाफ अरुको भन्दा फरक हुनेछ ।
विगत १८ महिनामा तपाईले कतिजना रोजगारदातासँग काम गर्नुभयो भन्ने प्रश्नको जवाफमा एकजना रोजगारदाता छनौट गर्नुहोला ।
त्यस्तै प्रश्न नम्बर ५ मा सोधिएको पार्ट टाइम वर्क, अनकल वर्कबाहेक तपाईको कुनै तपाईसँग थप आम्दानीको अरु विजनेश छ भन्ने प्रश्नमा तपाईले छैनमा टिक लगाउनुहोला ।
सबैभन्दा पछिल्लो रोजगारदाताको सेक्सनमा तपाईले रोजगारदाताको संघीय ईआईएन नम्बरमा खाली ठाउँ छाड्नुहोला । त्यस्तै रोजगारदाताको न्युयार्क स्टेट ईआर नम्बरमा पनि खाली ठाउँ छाड्नुहोला ।
पछिल्लो रोजगारदाताबारेको विवरणको दोश्रो भागमा अन्तिम रोजगारदाताको नाममा खालीठाउँ छाड्नुहोला । रोजगारदाताको ठेगानामा आफ्नो निवासको ठेगाना राख्नुहोला । रोजगारदाताको फोन नम्बरमा आफ्नै फोन नम्बर राख्नुहोला ।
यदि तपाईले यहाँ भनिएजसरी फर्म भर्नुभएको थिएन वा यदि तपाईले यो विवरणहरु राखेर फाइल गर्दा पनि कुनै समस्या आएमा डिपार्टमेन्ट अफ लेबरको फोन नम्बरमा सम्पर्क गर्न सक्नुहुनेछ ।
यो सुविधाका लागि आवेदन दिन यहाँ क्लिक गर्नुहोला ।