‘चारवटा फोनलाइन चौबीसै घण्टा खुला छन्, समस्या हुनेले फोन गर्नुहोला’ : राजदूत कार्की
प्रकाशित मिति : चैत्र १८, २०७६ मंगलबार
अमेरिकाका लागि नेपाली राजदूत डाक्टर अर्जुन कार्कीले अमेरिकामा रहेका नेपालीहरुलाई कोरोनासँग सम्बन्धित कुनै समस्या हुनेहरुका लागि दूतावासका तीनवटा फोन लाइन र न्युयोर्क कन्सुलेटको एउटा फोन लाइन चौबीसै घण्टा खुल्ला रहेको जानाकारी दिनुभएको छ । राजदूत कार्कीले आज आयोजित कन्फ्रेन्स कल बैठकमा उक्त जानकारी दिनुभएको हो । उहाँले भन्नुभयो – ‘हामीले दूतावासका तीनवटा लाइन र न्युयोर्क कन्सुलेटको एउटा फोन लाइन परामर्शका लागि चौबीस घण्टा उठ्ने व्यवस्था गरेका छौं । दूतावासको वेवसाइट र सामाजिक संजालमा सुचनाहरु सम्प्रेषण गरिरहेका छौं ।’
कोरोना संक्रमणबिरुद्ध जुध्न नेपाली समुदाय र विभिन्न संघसंस्थाका तर्फबमट भएको पहलको प्रशंसा गर्दै राजदूत कार्कीले भन्नुभयो – ‘म नेपाल सरकार र दूतावासका तर्फबाट यहाँहरुको योगदानको उच्च प्रशंसा गर्छु । र धन्यवाद दिन चाहन्छु ।’
नेपाल फर्कने चरणमा हुनुभएका पढाई सकिएका नेपाली विद्यार्थीहरु र भिजिटर भिसामा आउनुभएकाहरुले ओभरस्टे हुने चिन्ता व्यक्त गरेको उल्लेख गर्दै राजदूत कार्कीले यसबारेमा अमेरिकी सरकारलाई कुटनीतिक नोट पठाइसकेको जानकारी दिनुभयो । उहाँले भन्नुभयो – ‘यसको बारेमा धेरै चिन्ता नलिनुहोला । यो समस्या समाधान हुन्छ ।’
त्यस्तै नेपाली समुदायका दाजुभाईदिदीबहिनीको उपचारका लागि विशेष ध्यान दिन पनि अमेरिकी सरकारलाई कुटनीतिक नोट पठाएको पनि राजदूत कार्कीले जानकारी दिनुभयो । नेपालमा रहेका अमेरिकी नागरिकलाई नेपालमा रहँदा जुनसुकै सुविधा दिन तयार रहेको र अमेरिकामा रहेका नेपाली नागरिकलाई पनि पारस्परिक रुपमा त्यस्तै सुविधा उपलब्ध गराउन आफूहरुले अमेरिकी सरकारलाई अनुरोध गरेको कार्कीले जानकारी दिनुभयो ।
कन्फ्रेन्स कल बैठकमा एनआरएनए अमेरिकाका अध्यक्ष सुनिल शाह, जनसम्पर्क समिति अमेरिकाका सभापति आनन्द बिष्ट लगायत नेपाली समुदायका विभिन्न व्यक्तित्वहरुले समुदायका समस्या र समुदायका तर्फबाट भइरहेका गतिविधिबारे जानकारी दिएका छन् ।