कोरोनाले समस्यामा परेका अमेरिकामा रहेका नेपालीलाई सस्तो ब्याजमा २ हजार डलर
प्रकाशित मिति : चैत्र १२, २०७६ बुधबार
कोरोना महामारीका कारण समस्यामा परेका अमेरिकामा रहेका नेपालीलाई सस्तो ब्याजमा २ हजार डलर ऋण प्रदान गरिने भएको छ । न्युयोर्कमा रहेको एभरेष्ट फेडरल क्रेडिट युनियनले कोरोना महामारीका कारण समस्यामा परेका अमेरिकामा रहेका नेपालीहरुका लागि यस्तो प्याकेज ल्याएको हो ।
यो ऋण प्राप्त गर्नका लागि एभरेष्ट फेडरल क्रेडिट युनियनको कम्तीमा एउटा शेयर किनेको हुनुपर्छ, जसका लागि २५ डलर शुल्क लाग्छ । शेयर किन्दा २५ डलर र डिपोजिट २५ डलर गरी ५० डलर खर्च गरेर नयाँ सदस्य बन्नेहरुले पनि यो ऋण प्राप्त गर्नसक्ने प्रबन्धक विराज रिजालले जानकारी दिनुभयो । उक्त ५० डलर भने सदस्यकै खातामा रहनेछ ।
नेपाल सरकारको परिभाषामा एनआरएनभित्र पर्ने सबैजना यसका लागि योग्य हुनेछन् । अमेरिकामा रहेका कतिपय नेपाली विद्यार्थीहरुसमेत यो प्याकेजका लागि योग्य हुने रिजालले जानकारी दिनुभयो ।
यदि ऋण लिएको रकम ३० दिनभित्र भुक्तान गर्न सक्षम भएमा कुनै ब्याज लाग्नेछैन । तर किस्तामा तिर्न चाहनेहरुले १८ महिनाभित्र तिर्न सक्नेछन् । त्यसका लागि बार्षिक ब्याजदर १२ प्रतिशतमात्र लाग्नेछ । जबकी यस्तो ऋणका लागि अमेरिकामा ३६ प्रतिशतसम्म ब्याज तिर्नुपर्ने हुन्छ ।
१८ महिनामा तिर्न चाहनेहरुका लागि मासिक किस्ता १२१ डलर ९६ सेन्टस हुनेछ भने १८ महिनाको अवधिमा कुल ब्याज १९५ डलर २८ सेन्टस हुनेछ । अर्थात् २ हजार डलर ऋण लिनेले पूरै किस्ता तिर्दासम्म २१ सय ९५ डलर २८ सेन्टस तिर्नुपर्नेछ ।
अमेरिकाको जुनसुकै भूभागमा बस्ने नेपालीहरु यसको सदस्य बन्न सक्ने र ऋण आवेदन दिनसक्ने विराज रिजालले जानकारी दिनुभयो । सदस्य बन्नका लागि र ऋणका लागि वेवसाइटमार्फत आवेदन दिन सकिन्छ । तर अत्वाश्यक भएका व्यक्तिलेमात्र ऋण मागेमा सहज हुने रिजालले जानकारी दिनुभयो ।
सदस्य बन्नका लागि यहाँ क्लिक गर्नुहोला ।
ऋण आवेदनका लागि यहाँ क्लिक गर्नुहोला ।