गायिका कनिका कपुरलाई कोरोना संक्रमण
प्रकाशित मिति : चैत्र ७, २०७६ शुक्रबार
बलिउडकी चर्चित प्लेब्याक गायिका कनिका कपुरलाई कोरोना भाइरस (कोभिड–१९)को संक्रमण भएको पुष्टि भएको छ । कनिका कपुर १५ मार्चमा लण्डनबाट लखनऊ आएकी थिइन् ।
भारतीय सञ्चारमाध्यमका अनुसार एयरपोर्टमा उनी ग्राउण्ड स्टाफको मिलेमत्तोमा वासरुमबाट लुकेर निस्किएकी थिइन् । गायिका कनिकाले गत आइतबार मात्रै लखनऊको गैलेंटमा एक पार्टी अर्गनाइज गरेकी थिइन्, जहाँ लखनऊका ठूला ठूला अफिसरहरु पनि सामेल भएका थिए ।
गायिका कनिकालाई कोरोना संक्रमण भएको थाहा पाएपछि पूरै अपार्टमेन्टमा हंगामा भएको छ । शालिमार गैलेंटमा बस्दै आएका सम्पूर्ण मानिसहरु आफ्नो अपार्टमेन्ट छोडेर अन्यत्रै सिफ्ट भइरहेका छन् ।
गायिका कनिकाको पूरै परिवारनै उक्त विल्डिङमा बस्दै आएका छन् । जानकारी अनुसार कनिकाको पूरै परिवारलाई क्वारेन्टाइनमा राखिएको छ ।
हेल्थ डिपार्टमेन्टले गायिका कनिकाको सम्पर्कमा रहेका सबैलाई फोन गरेर सेल्फ आइसोलेट गर्नका लागि आग्रह गरिएको छ । अहिलेसम्म गायिका कनिकालाई बाहेक अन्य कसैलाई पनि कोरोनाको संक्रमण भेटिएको छैन ।
गायिका कनिकाले बेबी डाँल, जुगनी, चिट्टिया कलैयाँ, देशी लुकलगायतका कयौं चर्चित गीतहरु गाइसकेकी छन् ।चीनको वुहानबाट सुरु भएको कोरोना भाइरस (कोभिड–१९)का कारण भारतमा अहिलेसम्म चार जनाले ज्यान गुमाइसकेका छन् ।