कोरोना अतिप्रभावित मुलुकमा रहेका नेपालीसमेत आउन नपाउने
प्रकाशित मिति : चैत्र ६, २०७६ बिहीबार
कोरोना भाइरसको उच्च सतर्कता अपनाउँदै सरकारले प्रतिबन्ध लगाएका देशमा भएका नागरिकलाई विदेशमा नै रहन उच्चस्तरीय समिति सचिवालयका प्रवक्ता नारायण बिडारी आग्रह गरेका छन् ।
सरकारले प्रतिबन्धित देश युरोप, पश्चिम एसिया, मलेसिया, जापान, टर्की र दक्षिण कोरिया, खाडी मुलुकलगायतका देशमा रहेका नागरिकलाई चैत मसान्तसम्म नेपाल आउन नपाउने बिडारीले स्पष्ट पारे । साथै, प्रतिबन्धित देशबाट वा ती देशलाई ट्रान्जिट बनाएर नेपाल नफर्किन पनि उनले आग्रह गरे ।
यदि कुनै नेपाली विदेशमा संक्रमित भएको अवस्थामा त्यहीँ उपचार गर्न उनले आग्रह गरेका छन् । ‘जो जहाँ हुनुहुन्छ त्यहीँ बस्नुस् र बाटो खुलेपछि नेपाल आउनुस्,’ उनले भने ।
साथै, संक्रमणको घडीमा कुनै पनि मुलुकले नेपालीको भिसा अवधि सकियो भने देशबाट ननिकाल्ने हुँदा ढुक्क रहन उनले आग्रह गरेका छन् ।