कोरोना संक्रमित गर्भवती महिलाबाट जन्मेका बच्चामा कोरोना सर्दैन
प्रकाशित मिति : चैत्र ४, २०७६ मंगलबार
कोरोना भाइरसबाट संक्रमित गर्भवती महिलाबाट जन्मेको बच्चामा भाइरसको संक्रमण नहुने एक अध्ययनबाट पत्ता लागेको छ । चिनियाँ–अमेरिकी अनुसन्धानकर्ताकाे टाेलीले याे तथ्य पत्ता लगाएको हो ।
चिनियाँ जर्नल ‘फ्रन्टियर्स इन पेडियाट्रिक्स जर्नल’ मा प्रकाशित उक्त अध्ययन प्रतिवेदनका अनुसार ‘ह्वान्झोङ युनिभर्सिटी अफ साइन्स एन्ड टेक्नोलोजी’ का अध्ययनकर्ताले साे अनुसन्धान गरेका थिए । यसमा वुहान विश्वविद्यालयका अमेरिकी तथा चिनियाँ अध्ययनकर्ताहरूको पनि संलग्नता थियो ।
यो अध्ययन प्रतिवेदन ‘द लन्सेट जर्नल’ मा पनि प्रकाशित भएको छ । अनुसन्धानकर्ताले भाइरस संक्रमित आमाले बच्चा जन्माउँदा त्यसको संक्रमण शिशुमा नदेखिएको नतिजा सार्वजनिक गरेका हुन् ।
उक्त अध्ययन कोभिड–१९ बाट संक्रमित चार जना गर्भवती महिलामा गरिएको थियो, जसले कोरोना भाइरसको उद्गम मानिएको चीनको वुहानस्थित युनियन अस्पतालमा बच्चालाई जन्म दिएका थिए । गत महिना कोरोना भाइरसबाट संक्रमित गर्भवती महिलाले बच्चा जन्माएपछि अध्ययन सुरु गरिएको थियो । यो चीनमा भएको दोस्रो अध्ययन हो।
अध्ययनका क्रममा जन्मिएका सबै शिशुलाई एनआइसियुमा राखिएको थियो । तर ती कुनै पनि बच्चामा कोरोना भाइरस संक्रमणको लक्षण देखिएन ।
प्रतिवेदनअनुसार, एउटा बच्चामा तीन दिनसम्म श्वास प्रश्वाससम्बन्धी समस्या देखिएको थियो भने उक्त बच्चासहित अर्को एक बच्चामा केही दागहरु देखिएका थिए । तर ती दाग र स्वास्थ्य समस्या आफै समाधान भए । जन्मिएका चार बच्चामध्ये ३ जनामा कोरोना भाइरसको संक्रमण परीक्षण गरिएको थियो तर एक बच्चामा आमाको अनुमति नहुनाले परीक्षण गरिएको थिएन ।
अहिले अध्ययन गरिएका चारवटै बच्चा र आमा पनि पूर्णरुपमा स्वस्थ भइसकेका छन् । चीनको हुबेई प्रान्तको वुहानलाई केन्द्रबिन्दु मानिएको भाइरसबाट विश्वव्यापी रुपमा अहिलेसम्म १ लाख ७० हजारभन्दा बढी संक्रमित भएका छन् भने ६ हजारभन्दा बढीको ज्यान गइसकेको छ ।