न्युयोर्कका नेपाली कोरोना संक्रमणको आशंकामा अस्पताल भर्ना, ल्याब टेस्टको रिजल्ट आउन बाँकी


प्रकाशित मिति : चैत्र ४, २०७६ मंगलबार

न्युयोर्कमा एकजना नेपालीलाई कोरोना संक्रमणको आशंकामा अस्पतालमा आइसोलेसनमा राखिएको छ । निमोनियाको जस्तो लक्षण देखिएपछि अस्पतालमा भर्ना गरिएका उनलाई कोरोना सक्रमण भए नभएको परीक्षण गरिएको छ ।

५० बर्षभन्दा माथिका ती व्यक्तिलाई न्युयोर्कको एल्महस्ट अस्पतालमा भर्ना गरिएको छ । विगत चारदिनदेखि अस्पतालमा भर्ना गरिएको जानकारी आफूले प्राप्त गरेको शान्ता थोकरले जानकारी दिए । थोकरले एकजना नेपाली कोरोना संक्रमणको आशंकामा अस्पतालको आईसीयुमा रहेको भन्दै सामाजिक सञ्जालमा पोष्ट गरेका थिए ।

ल्याब टेस्टको रिपोर्ट भने अहिलेसम्म आइनसकेको जनाइएको छ । आज बेलुकासम्म ल्याब टेस्टको रिपोर्ट आउने अपेक्षा गरिएको छ । उनको परिवारका सदस्यहरुलाई अस्पतालले सेल्फ क्वारेन्टाइनमा बस्न भनेको छ ।

परिवारका सदस्यहरु सेल्फ क्वारेन्टाइनमा बसिरहेको जनाइएको छ । यसबारे परिवारका सदस्यलाई सम्पर्क गर्न खोज्दा सम्पर्क हुन सकेको छैन ।

अहिलेसम्म अमेरिकामा नेपालीलाई कोरोना संक्रमण पुष्टी भइसकेको छैन । तर केही नेपालीहरु सेल्फ क्वारेन्टाइनमा बसिरहेका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com