कोरोना संक्रमणको आशंकामा ४ सय ९६ जनाको परीक्षण, सबैमा नेगेटिभ
प्रकाशित मिति : चैत्र ४, २०७६ मंगलबार
कोरोना भाइरस कोभिड १९ संक्रमणको आशंका गरेर नमुना परीक्षण गरिएका ४ सय ९६ जनाको रिपोर्ट नेगेटिभ देखिएको छ ।
राष्ट्रिय जनस्वास्थ्य प्रयोगशालाको तथ्याङ्कअनुसार परीक्षण गरिएका सबैमा भाइरस नेगेटिभ देखिएको हो । कोरोना भाइरसको आशंकामा देशैभरका विभिन्न अस्पतालको आइसोलेसनमा भर्ना भएकाको नमुना परीक्षण गर्न प्रयोगशालामा ल्याइएको थियो ।
परीक्षण गर्दा सबैको रिर्पोट नेगेटिभ देखिएको प्रयोगशालाले जनाएको छ । विभिन्न अस्पतालले कोरोना भाइरसको आशंकामा आज पनि अपराह्नसम्ममा १५ जनाको नमुना परीक्षणका लागि ल्याइएको बताइएको छ । उनीहरुरको पनि आजै रातिसम्म रिपोर्ट आउने राष्ट्रिय जनस्वास्थ्य प्रयोगशालाले जनाएको छ ।
प्रयोगशालामा गरिएको परीक्षणमा कुनैपनि शंका गर्नुपर्ने ठाँउ नरहेको राष्ट्रिय जनस्वास्थ्य प्रयोगशालाका चिकित्सकहरुको भनाइ छ । नेपालमा गरिएको रिपोर्टलाई नमुना परीक्षणका लागि हङकङ पठाएर पुनः परीक्षण गर्दा पनि उही रिपोर्ट आएकाले नेपालमा गरिएको परीक्षण विश्वसनीय मान्न सकिने चिकित्सहरुको भनाइ छ ।
हाल प्रयोगशालामा हरेक दिन कोरोना आशंकामा आएका ८ जना सम्मको स्वास्थ्य परीक्षण गरिँदै आइएको छ । यदि कोरोनाले नेपालमा महामारीको रुप लिए आवश्यकता अनुसार क्षमता बढाउदै लैजाने गरी प्रयोगशालालाई तयार अवस्थामा राखिएको छ ।
त्यसका लागि एक विकल्प एचआइभीका परीक्षण सेवालाई कटौती गरेर त्यहाँका डाक्टरहरुलाई कोरोना भाइरस संक्रमणको जाँच कक्षमा ल्याउन सकिने बताइएको छ । हाल नेपालमा कोरोनाको परीक्षण गर्ने पूर्वाधार रहेपनि जनशक्ति अपुग रहेको पनि बताइएको छ ।