स्वर्गीय केशब भट्टराईको परिवारलाई अमेरिकामा रहेका नेपाली कलाकर्मीबाट साढे १० लाख सहयोग
प्रकाशित मिति : चैत्र २, २०७६ आईतबार
अमेरिकामा रहेका नेपाली कलाकर्मीहरुले स्वर्गीय केशब भट्टराईको परिवारलाई १० लाख ७ हजार ९ सय ६० रुपैया सहयोग गरेका छन् । उक्त सहयोग रकम बरिष्ठ कलाकार नीर शाहले स्वर्गीय भट्टराईकी श्रीमती नीता भट्टराईलाई हस्तान्तरण गरियो ।
चलचित्र विकास बोर्डको कार्यालयमा एक कार्य्रक्रमकाबीच रकम हस्तान्तरण गरिएको हो । अमेरिका बाहेक बेल्जियम र क्यानाडामा रहेका कलाकर्मीहरुले पनि सहयोग गरेका छन् ।
अमेरिकामा निर्देशक एवम संचारकर्मी सुरेश दर्पण पोखरेलको संयोजनमा संकलिन रकम हस्तान्तरण कार्यक्रममा अभिनय शिरोमणी नीर शाह, चलचित्र बिकास बोर्ड पूर्व अध्यक्ष राज कुमार राई , निर्देशक र कलाकार दीपाश्री निरौला , रमेश पोखरेल , सुर्य बोहोरा , प्रकाश सुबेदी , नवराज श्रेष्ठ लगायतको उपस्थिती रहेको थियो ।
अमेरिकामारहेका कलाकर्मीले विगगतमा पनि कलाकार स्वर्गीय दीपक छेत्रीको क्यान्सर उपचार सहयोगार्थ करिव १० लाख रुपैया र गायक आनन्द कार्कीकी श्रीमती ईश्वरी कार्कीको उपचार सहयोगार्थ १ लाख २५ हजार सहयोग गरेका थिए ।