अमेरिकी राष्ट्रपति चुनाव : सुपर ट्युजडे प्राइमरीका नतिजा, ३ राज्यमा बाइडेन, एकएकमा बर्नी र ब्लुमबर्ग विजयी


प्रकाशित मिति : फाल्गुन २०, २०७६ मंगलबार

अमेरिकाका १४ राज्य र अमेरिकन सामाओमा आज सम्पन्न डेमोक्रेटिक प्राइमरीको नतिजा आउन सुरु भएको छ । अहिलेसम्मको नतिजा अनुशार तीन राज्यमा जो बाइडेन विजयी भएका छन् ।

अलाबामा, नर्थ क्यारोलिना र भर्जिनियामा बाइडेन विजयी भएका हुन् । भर्मोन्टमा बर्नी स्याण्डर्स विजयी भएका छन् भने अमेरिकन सामोआमा माइकल ब्लुमबर्ग विजयी भएका छन् ।

अमेरिकी राष्ट्रपतिका लागि डेमोक्रेटिक उम्मेदवार छान्ने राष्ट्रिय महाधिवेशनका लागि डेलिगेट छान्ने आजका प्राइमरी र ककसमा सबैको ध्यान केन्द्रीत छ । चुनावी मैदानमा ५ जनामात्र उम्मेदवारहरु बर्नी स्याण्डर्स, जो बाइडेन, माइक ब्लुमबर्ग, एलिजावेथ वारेन र तुल्सी गब्बार्डमात्र रहेका छन् भने आज मंगलबार १४ राज्य र अमेरिकन सामोआमा प्राइमरी र ककसहरु भएका छन् ।

आजका प्राइमरीबाट १३४४ प्रतिबद्ध डेलिगेटहरु छनौट हुनेछन् । अलाबामाबाट ५२ डेलिगेट, अमेरिकन सामोआबाट ६, अर्कान्सासबाट ३१ डेलिगेट छानिनेछन् भने सबैभन्दा धेरै क्यालिफोर्नियाबाट ४१५ डेलिगेट छानिनेछन् । कोलोराडोबाट ६७, मेनबाट २४, मासाचुसेट्सबाट ९१, मिनेसोटाबाट ७५, नर्थ क्यारोलिनबाट ११०, ओक्लाहोमाबाट ३७, टेनेसीबाट ६४ र टेक्सासबाट २२८ डेलिगेटका लागिपनि आज नै चुनाव भएका छन् ।

त्यस्तै युटाहबाट २९, भर्मोन्टबाट १६, भर्जिनियबाट ९९ डेलिगेटको छनौट गरिनेछ । जुन उम्मेदवारले धेरै मत प्राप्त गर्नेछन्, ती उम्मेदवारले नै धेरै डेलिगेट प्राप्त गर्नेछन् । अमेरिकी राष्ट्रपतिको डेमोक्रेटिक उम्मेदवार बन्नका लागि १९९१ प्रतिबद्ध डेलिगेटसहरु आफ्नो पक्षमा हुन जरुरी छ । अमेरिकाभर कुल प्रतिबद्ध डेलिगेटहरुको संख्या ३९७९ हुनेछ ।

अब  अमेरिकी राष्ट्रपतिका लागि डेमोक्रेटिक पार्टीका तर्फबाट आउनसक्ने उम्मेदबारबारे छनक मिल्नसक्नेछ । पहिले नै ४ प्राइमरी र ककस सम्पन्न भइसकेकाले १४९९ मध्ये कति डेलिगेट कुन उम्मेदवारले पाउने भन्ने कुराले आगामी चुनावी परिदृश्यको आकलन गर्न सहज हुनेछ ।

डेमोक्रेटिक पार्टीका राज्यका प्राइमरीहरु र ककसहरुमा मतदाताहरुले सम्भावित राष्ट्रपति उम्मेदवारहरुलाई मतदानमार्फत चुन्छन् । बन्द प्राइमरी वा ककसमा रजिस्टर्ड मतदाताहरुलेमात्र भोट हाल्न पाउँछन् ।

हरेक प्राइमरी र ककसमा डेलिगेट्सहरुको निश्चित नम्बर हुन्छ । उनीहरुले राष्ट्रिय महाधिवेशनमा आफ्नो राज्यको प्रतिनिधित्व गर्छन् । प्राइमरी वा ककसबाट जुन उम्मेदवारले आफ्नो पक्षका धेरै डेलिगेट्सहरु प्राप्त गर्छ, त्यही उम्मेदवारले राष्ट्रिय महाधिवेशन मार्फत प्राइमरी जितेर राष्ट्रपतिको अन्तिम प्रतिस्पर्धामा भाग लिन पाउँछ । पार्टीका आफ्ना स्वतन्त्र डेलिगेट्स र सुपरडेलिगेट्स पनि हुन्छन् । स्वतन्त्र वा सुपरडेलिगेटहरु कुनै निश्चित उम्मेदवारलाई मतदान गर्न बाध्य हुँदैनन् ।

डेमोक्रेटिक पार्टीको राष्ट्रिय महाधिवेशन

डेमोक्रेटिक पार्टीको राष्ट्रिय महाधिवेशन आगामी जुलाई १३ देखि १६ सम्म हुनेछ । यो महाधिवेशनबाटै राष्ट्रपति र उपराष्ट्रतिका लागि पार्टीका तर्फबाट अन्तिम उम्मेदवारको टुंगो लगाइनेछ । ककस र प्राइमरीबाट छानिएका डेलिगेटसहरुले जुन उम्मेदवारका लागि छानिएका हुन्, त्यही उम्मेदवारलाई मत हाल्नुपर्छ भने स्वतन्त्र र सुपरडेलिगेटले आफूले चाहेको उम्मेदवारलाई मत हाल्न पाउँछन् ।

पहिलो राउण्डमा मतदान हुँदा उम्मेदवारका प्रतिबद्ध डेलिगेटहरुलेमात्र भोट हाल्न पाउँछन्, यति उनीहरुले भोट हाल्दा कसैको पनि बहुमत नआएमा स्वतन्त्र डेलिगेटहरुले भोट हाल्न पाउँछन् । पहिलो राउण्डमा कसैको पनि बहुमत नआएमा दोश्रो राउण्डमा प्रतिबद्ध डेलिगेटहरुले पनि जुनसुकै उम्मेदवारलाई भोट हाल्न पाउँछन् भने स्वतन्त्र वा सुपर डेलिगेटले पनि भोट हाल्न पाउँछन् ।

पहिलो राउण्डको चुनावबाट डेमोक्रेटिक पाईमरीमा छानिनका लागि राष्ट्रपति उम्मेदवारले कम्तीमा १९१९ मत ल्याउनुपर्नेछ । यदि पहिलो राउण्डमा उक्त मत ल्याउन नसकेको खण्डमा सुपरडेलिगेटहरुले समेत दोश्रो राउण्डमा त हाल्नेछन् र प्राइमरी जित्नका लागि २२९८ मत ल्याउनुपर्नेछ ।

विभिन्न राज्यबाट महाअधिवेशनमा प्रतिनिधित्व गर्ने डेलिगेट्सहरुको संख्या तय गरिएको हुन्छ । उदाहरणका लागि न्युयोर्कबाट २७४ प्रतिबद्ध डेमोक्रेटिक डेलिगेट्सले भाग लिनेछन् भने क्यालिफोर्नियाबाट सबैभन्दा धेरै ४१५ जना डेमोक्रेटिक डेलिगेट्सहरुले महाधिवेशनमा भाग लिनेछन् ।

महाधिवेशनबाट चुनिएका राष्ट्रपतिका एकजना डेमोक्रेटिक उम्मेदवारले रिपब्लिकन उम्मेदवारसँग अन्तिम चुनावमा प्रतिस्पर्धा गर्नेछन् । सन् २०१६ को डेमोक्रेटिक नेशनल कन्भेन्सनमा हिलारी क्लिन्टनले २८४२ र बर्नी स्याडर्सले १८६५ मत ल्याएका थिए । र हिलारी क्लिन्टन नै ट्रम्मसँग चुनाव लड्नका लागि छानिएकी थिइन् ।

यसरी हुन्छ अमेरिकामा राष्ट्रपति चुनाव

अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।

यदि राष्ट्रपतिका लागि कसैले पनि पूर्ण बहुमत प्राप्त गर्न नसकेको खण्डमा प्रतिनिधीसभाले राष्ट्रपति छान्ने र उपराष्ट्रपतिका लागि कसैले पनि पूर्ण बहुमत प्राप्त गर्न नसकेमा सिनेटले उपराष्ट्रपति छान्ने व्यवस्था रहेको छ । जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ ।

५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । धेरैजसो अमेरिकी राज्यले प्राय एउटै दलका उम्मेदवारहरुलाई जिताउने गरेपनि फ्लोरिडा, पेन्सिलभेनिया र ओहायोको महत्व भिन्न रहेको छ । यी राज्यहरुले राष्ट्रपतीय चुनावमा आफ्नो अभिमत बदल्दै आएका छन् । तीनको निर्णयले सबै चुनावी परिणाम बदल्न सक्ने भएकाले यी तीन राज्यलाई विशेष महत्वका साथ हेर्ने गरिन्छ ।

सन् २०१२ को राष्ट्रपतीय चुनावमा बराक ओबामाले ३३२ इलेक्टोरल मत प्राप्त गरेका थिए भने मिट रोम्नीले २०६ इलेक्टोरल मत प्राप्त गरेका थिए । सन् २००८ को राष्ट्रपतीय चुनावमा भने ओबामाले ३६५ इलेक्टोरल मत प्राप्त गरेका थिए । त्यतीबेला उनका प्रतिस्पर्धी जोन म्याकनले १७३ इलेक्टोरल मत प्राप्त गरेका थिए । सन् २०१२ को चुनावसम्म आइपुग्दा ओबामाको लोकप्रियता कम भएको थियो ।

© 2025 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com