मेक्सिकोबाट विना जाँच सिमा पार गरेर आउनेलाई एसाइलम नदिने नियम कार्यान्वयनमा रोक
प्रकाशित मिति : फाल्गुन १६, २०७६ शुक्रबार
मेक्सिकोबाट विना जाँच सिमा पार गरेर अमेरिका आउने कागजपत्रविहिनहरु एसाइलम आवेदन दिन अयोग्य हुने ट्रम्प प्रशासनको नियम कार्यान्वयनमा अदालतले रोक लगाएको छ । नवौं सर्किट कोर्टको आजको आदेशले सिमाक्षेत्रको पोर्ट अफ इन्ट्रीबाहेकका क्षेत्रबाट विना जाँच प्रवेश गर्नेलाई एसाइलमका लागि अयोग्य बनाउने नियम कार्यान्वयनमा रोक लगाएको हो ।
अदालतमा तीनजना न्यायाधिसले निर्विरोध रुपमा यो नियम कार्यान्वयनमा रोक लगाएका हुन् । संघीय अदालतले नियम कार्यान्वयनमा रोक लगाएकोमा पुनरावेदनले रोक लगाउने उक्त आदेशलाई सही ठहर गरेको हो ।
यो नीति कहिलेसम्म कार्यान्वयनमा रोक लाग्ने भन्ने कुरा निश्चित छैन । किनभने ट्रम्प प्रशासन यो आदेशबिरुद्ध सर्वोच्च अदालतमा जाने सम्भावना रहेको छ । सर्बोच्चले अधिकांश अध्यागमनका मुद्दामा ट्रम्प प्रशासनकै साथ दिदै आएको छ ।
ट्रम्प प्रशासनले एसाइलमको नीतिमा सुरुदेखि नै निकै कडाई गर्दै आएको छ । अमेरिकामा एसाइलम खोज्नेलाई तेश्रो मुलुक पठाउन सकिने नीति अहिलेपनि कार्यान्वयनमा रहेको छ ।
यो नीति अन्तरगत अमेरिकाले कैयन एसाइलम आवेदकलाई तेश्रो मुलुक पठाइसकेको छ । जसको आप्रवासी अधिकारकर्मीहरुले चर्को विरोध समेत गर्दै आएका छन् ।
