कुवेतमा निर्माणस्थलमा पुरिएर ज्यान गुमाउने ४ नेपाली र घाइतेको पहिचान (नामावलीसहित)
प्रकाशित मिति : फाल्गुन १, २०७६ बिहीबार
कुवेतमा बुधबार निर्माणस्थमा पुरिएर ज्यान गुमाउने ६ जना नेपालीहरुमध्ये ४ जनाको परिचय खुलेको छ । २ जनाको भने स्पष्ट विवरण आउने क्रममा रहेको त्यहाँस्थीत नेपाली दूतावासले जनाएको छ ।
मृतक ६ जनामध्ये ४ जनामा पाल्पाका एकबहादुर गाहा, सिराहाका गंगाराम चौधरी, ताप्लेजुङका वशन्त गुरुङ र दाङका श्याम नारायण चौधरी रहेको कुवेत स्थीत नेपाली दूतावासले जनाएको छ । घाइतेहरुमा २ जना नेपालीहरु रहेको पनि दूतावासले जनाएको छ ।
घाइते मध्ये धर्मेन्द्र कुमार शाहको कुवेतस्थीत जाहरा अस्पतालमा उपचार भइरहेको छ भने सामान्य घाइते मनोरथ मण्डल उपचार पश्चात कम्पनीमा फर्किसकेका छन् । घटनाप्रति कुवेतमा रहेको नेपाली दूतावासले गहिरो दुख व्यक्त गरेको छ ।
बालुवा र ढुंगाको ढिस्कोले निर्माण स्थलमा पुरिएर ६ जनाको ज्यान गएको थियो भने २ जना घाइते भएका थिए । निर्माणका क्रममा काम गरिरहेका उनीहरुमाथि बालुवाको थुप्रो र ग्राभेल खसेको थियो ।
कामदारहरु पुरिएको सुचना प्राप्त गर्नासाथ उद्दारकर्ताहरु घटनास्थलमा पुगेका थिए । उद्दारकर्ताहरुले घटनाथस्लबाट ६ जनाको शव निकालेका थिए भने २ जनालाई जीवितै उद्दार गरिएको थियो ।
निर्माणस्थलमा ६ जना नेपालीको मृत्यु भएकोमा कुवेतका अमिर शेख सबाब अल अहमद अल जबेर अल सबाबले नेपालकी राष्ट्रपति विद्या भण्डारीलाई समवेदना सन्देश पठाएका छन् । अल मुतला हाउजिंग परियोजना अन्तरगत यो दुर्घटना भएको हो ।
त्यस्तै कुवेतका राजकुमार र प्रधानमन्त्रीले पनि नेपालका राष्ट्रपति भण्डारीलाई समवेदना सन्देश पठाएका छन् ।
यसअगाडि सार्वजनिक निर्माणमन्त्री र आवास मामिला राज्यमन्त्रीले घटनास्थलको अवलोकन गरेकी छिन् । उनले घटनाको छानविनका लागि छानविन समिति गठन गर्न निर्देशन दिएकी छिन् । कुनै लापरवाहीका कारण घटना भएको भए लापरवाही गर्नेलाई जिम्मेबार ठहराउन उनले निर्देशन दिएकी छिन् ।
