सप्तकोसीमा सञ्चालित पानी जहाज सेवा बन्द
प्रकाशित मिति : फाल्गुन १, २०७६ बिहीबार
सप्तकोसी नदीमा सञ्चालित पानी जहाज सेवा बन्द भएको छ । स्थानीय केही समूहले रकम माग्ने, निःशुल्क चढ्न पाउनुपर्ने, टिकटमा कमिसन दिनुपर्नेलगायत माग राख्न थालेपछि बिहीबारबाट जल यातायात व्यवसायीले सेवा बन्द गराएका हुन् ।
उनीहरुले बिहीबार एक पत्रकार सम्मेलन गर्दै सरकारले कानून निर्माण गरी नियमन गर्नु पर्ने र भाडादर कायम गर्नु पर्ने लगायतका माग राख्दै अनिश्चितकालका सेवा बन्द गराएको बताएका छन् । सप्तकोसीमा पानी जहाज सेवा गत वर्षदेखि नियमित सञ्चालनमा आएको थियो । सप्तकोसीमा चतराघाटदेखि भोजपुरको हतुवागढीको सिम्लेसम्म सात वटा पानी जहाज चल्दै आएका छन् ।
पानी जहाज सञ्चालनमा आएपछि तराघाटबाट बराहक्षेत्र र भोजपुरका विभिन्न भागसम्म पुग्ने यात्रुलाई आउजाउमा सहज हुँदै आएको थियो ।