आज विश्व कण्डम दिवस : विभिन्न कार्यक्रम गरि मनाइँदै
प्रकाशित मिति : फाल्गुन १, २०७६ बिहीबार
विश्व कण्डम दिवसका अवसरमा आज नेपालमा पनि विभिन्न कार्यक्रम गरि मनाइँदै छ । स्वास्थ्य तथा जनसंख्या मन्त्रालयका अनुसार दिवसको अवसरमा आयोजित कार्यक्रमहरुमा एचआईभी एड्स, यौनरोग तथा अनिच्छित गर्भ रहनबाट बच्न कण्डमको प्रयोग गर्नुपर्ने एवं प्रयोग गर्दा अपनाउनुपर्ने सावधानीका बारेमा जानकारी दिइने छ ।
विश्वमा यौन रोगहरु बढ्दो अवस्थामा छन् । हाल सबैभन्दा बढी यौन रोग अफ्रिकामा रहेको तथ्यांक छ । प्रत्येक वर्ष फेब्रुअरी १३ मा कण्डम दिवस मनाइन्छ । प्रजनन एवं यौन सचेतनामुलक काम गर्दै आएका संघसंस्थाले गाउँ तथा सहरहरुमा विभिन्न चेतनामूलक कार्यक्रम गरी यो दिवस मनाउँदै छन् । नेपालमा हाल स्वास्थ्य सेवा विभागले २०१७ मा गरेको अध्ययनअनुसार देशमा कुल जनसंख्याको आठ प्रतिशतले मात्रै कन्डमको प्रयोग गर्ने गरेको पाइएको छ । यसप्रतिको धारण गलत रहन जाँदा यस्तो भएको विभागको दाबी छ । कन्डमको प्रयोग नगर्ने समुदायमा यौँन रोग बढ्दै गएको र यसबारे नकारात्मक धारणा हटाएर कण्डमको महत्तवबारे बुझाउने खालका कार्यक्रम गर्न आवश्यक रहेको विज्ञहरु बताउँछन् ।
यसैबिच कण्डम दिवसका अवसरमा बुटवलको ट्राफिक चोकमा पनि वृहत सांस्कृतिक कार्यक्रम आयोजना गरिएको छ । दिउँसो एकबजेदेखि राती ८ बजेसम्म चल्ने कार्यक्रममा एकघण्टा सामाजिक विकास मन्त्रालय प्रदेश ५ को औपचारिक कार्यक्रमसँगै एड्स र कण्डमसँग सम्बन्धित विभिन्न प्रस्तुतीहरु रहने छन् । कार्यक्रममा कण्डमको प्रयोग सम्बन्धी जानकारी गराउँदै निःशुल्क कण्डम वितरण गरिने आयोजक आस्था समूह र सहयोगी संस्था ए.एच.एफ नेपालले बुधबार पत्रकार सम्मेलन गरी जानकारी गराएको छ ।