नागरिकता नभएपनि आदिवासीहरुलाई देशनिकाला गर्न नपाइने सर्बोच्चको फैसला
प्रकाशित मिति : माघ २८, २०७६ मंगलबार
अष्ट्रेलियाको सर्वोच्च अदालतले त्यहाँको नागरिकता नभएपनि आदिवासीहरुलाई देशनिकाला गर्न नपाइने फैसला गरेको छ । अष्ट्रेलियाको आदिवासी समुदायका बुबाआमाबाट अष्ट्रेलियाबाहिर जन्मेको व्यक्तिले अष्ट्रेलियाको नागरिकताको लागि आवेदन नदिएपनि उनीहरुलाई देशनिकाला गर्न नपाइने भएको छ ।
अष्ट्रेलियन नागरिकताका लागि कहिले पनि आवेदन नदिएका विदेशमा जन्मेका दुईजनाको सन्दर्भमा अष्ट्रेलियाको सर्बोच्च अदालतले यस्तो फैसला सुनाएको हो । अष्ट्रेलियाको सरकारले अपराधमा दोषी ठहरिएका सयौं आप्रवासीहरुलाई देशनिकाला गर्ने कदम चालेको छ, जसमा दुईदेशको नागरिकता लिएकाहरुका सन्दर्भमा समेत अष्ट्रेलियन नागरिकता खोस्न सक्ने जनाइएको छ ।
सर्बोच्च अदालतमा पुगेका डेनियल लभ र ब्रेण्डन थोम्स अष्ट्रेलियाबाहिर जन्मेका थिए भने उनीहरुका बुबाआमामध्ये एकजना अष्ट्रेलियाका आदिवासी नागरिक थिए । दुबैजना अष्ट्रेलियामा पीआर लिएर बसेका थिए, तर नागरिकताका लागि आवेदन दिएका थिएनन् । दुबै अपराधमा संलग्न भएको पाइएपनि उनीहरुको भिसा खारेज गरिएको थियो ।
अष्ट्रेलियाको सरकारले उनीहरुलाई विदेशीको रुपमा लिएर पपुवा न्युगिनी र न्युजिल्याण्ड डिपोर्ट गर्ने योजना बनाएको थियो । तर सर्बोच्चले उनीहरुलाई अष्ट्रेलियन नागरिक सरह व्यवहार गर्नुपर्ने र उनीहरु अष्ट्रेलियामा रहन सक्ने फैसला गरेको छ ।
अष्ट्रेलियाको सर्बोच्च अदालतको यो फैसलाले आदिवासी समुदायबाट विदेशमा जन्मिएकाहरुले नागरिकताका लागि आवेदन नदिएपनि स्वत अष्ट्रेलियन नागरिक हुनसक्ने बाटो स्पष्ट पारिदिएको छ ।