चाइना हुँदै नेपाल जाने वा युरोप अमेरिका आउने टिकट लिनुभएको थियो ? ट्राभल एजेन्टका टिप्सहरु
प्रकाशित मिति : माघ २०, २०७६ सोमबार
यदि तपाईले चाइना हुँदै नेपाल जाने वा चाइना हुँदै युरोप अमेरिका हुँदै विभिन्न मुलुकमा जाने टिकट लिनुभएको थियो ? यदि लिनुभएको थियो भने पक्कै पनि तपाईले आफ्नो फ्लाइट के होला भनेर चिन्ता लिनुभएको होला ।
एकातिर चीनबाट नेपाल जाने ५ वटा एयरलाइन्सले आफ्ना उडानहरु बन्द गरेको छ भने चाइना साउदर्नले उडानहरु सिमित गरेको छ । त्यस्तै चीनहुँदै अमेरिका आउने वा अन्य देशमा जाने उडानहरु पनि बन्द गरिएका छन् । चीनहुँदै अमेरिका आउने अमेरिकी नागरिक र ग्रिनकार्डवाहकबाहेक अरुलाई अमेरिका प्रवेश नदिइने अमेरिकाले घोषणा गरिसकेको छ ।
यो अवस्थामा पहिले नै टिकट लिएकाहरुलाई न्युयोर्कको ज्याक्सनहाइटमा ट्राभल हाउस नेपाल संचालन गरिरहनुभएका बिष्णुमान प्रधानले विभिन्न टिप्सहरु दिनुभएको छ ।
यदि तपाईले चीनहुँदै जान आउनका लाथि आफ्नो टिकट बुक गर्नुभएको थियो भने तपाईलाई अधिकांश एयरलाइन्सले उक्त टिकटका लागि रिफण्ड दिइरहेका छन् । त्यसैले तपाईले यथाशीघ्र आफ्नो एजेन्ट वा अनलाइनबाट टिकट लिएको खण्डमा कुन वेवसाइटबाट लिनुभएको हो, त्यहाँ सम्पर्क गर्न उहाँले सुझाव दिनुभएको छ ।
अमेरिकाबाट नेपालीहरुले चाइना साउदर्नमार्फत नेपाल जाने आउने टिकटहरु बुक गरेको र चाइना साउदर्नले सबै टिकटको मूल्य रिफण्ड गरिरहेको उहाँले जानकारी दिनुभयो । चाइना साउदर्नले नेपालको उडान सम्पूर्णरुपमा बन्द नगरेको भएतापनि कैयन उडानहरु कटौती गरेको छ । तर पनि चाइना साउदर्नले टिकटको मूल्य रिफण्ड दिइरहेको प्रधानले जानकारी दिनुभयो ।
यदि एजेन्टमार्फत टिकट काटेको भएमा एजेन्टलाई सम्पर्क गरेर रिफण्ड लिन सकिनेछ भने अनलाइनमार्फत काटेको भएमा पनि वेवसाइटमा सम्पर्क गरेर पूरै रकम रिफण्ड लिन सकिनेछ । चाइना इस्टर्नले नेपालका सबै उडानहरु रद्द गरिसकेकाले चाइना इस्टर्नको टिकट काटेकाहरुले पनि रिफण्ड लिन सक्नेछन् ।
तर अहिले चाइना हुँदै जानेआउने उडानहरु रद्द भएका कारण अन्य एयरलाइन्समा टिकटको मूल्य निकै उच्च भएको छ । विगतमा सात आठसय डलरमा पाइने टिकट अहिले ११ सय डलर नाघिसकेको उहाँले जानकारी दिनुभयो ।