युएससीआईएसबाट बायोमेट्रिक संकलनबारे नयाँ नीति जारी
प्रकाशित मिति : माघ १६, २०७६ बिहीबार
युएससीआईएसले बायोमेट्रिक संकलनबारे नयाँ नीति जारी गरेको छ । युएससीआईएसमा ग्रिनकार्ड लगायतका अध्यागमनसँग सम्बन्धित प्राय आवेदनका सन्दर्भमा बायोमेट्रिक दिनुपर्ने प्रावधान रहेको छ ।
युएससीआईएसले उक्त बायोमेट्रिक विवरण आवेदकको परिचय प्रमाणिकरणदेखि आपराधिक र राष्ट्रिय सुरक्षा पृष्ठभूमि परीक्षणका लागि समेत प्रयोग गर्दै आएको छ । युएससीआईएसले मोबाइल बायोमेट्रिक सेवा औंठाछाप सुविधाका सन्दर्भमा नयाँ नीति जारी गरेको हो ।
नयाँ नीति अनुशार जेलभित्र रहेकाकारण बायोमेट्रिक अप्वाइन्टमेन्टमा आउन नसक्नेहरुका लागि युएससीआईएसले जेलमै गएर बायोमेट्रिक लिन बन्द गर्ने भएको छ । डिपार्टमेन्ट अफ होमल्याण्ड सेक्युरिटीबाट संचालित बाहेकका जेलमा रहेकाहरुका सन्दर्भमा यो नीति लागु हुनेछ । तर डिपार्टमेन्ट अफ होमल्याण्ड सेक्युरिटी अन्तरगत संचालित जेलमा रहेका व्यक्ति बायोमेट्रिक अप्वाइन्टमेन्टमा आउन नसक्ने भएमा भने आइसमार्फत बायोमेट्रिक संकलन गरिनेछ ।
त्यस्तै युएससीआईएसले अपांगता वा अन्य कुनै अस्वस्थताका कारण बायोमेट्रिक अप्वाइन्टमेन्टमा आउन नसक्नेहरुका लागि समेत विशेष प्रवन्ध गर्दै आएको छ ।
युएससीआईएसले कुनै एउटा आवेदनसँग सम्बन्धित औठाछाप दिनु नपर्ने सुविधा अर्को आवेदनमा प्रयोग गर्न नपाइने स्पष्ट पारेको छ । कुनै स्वास्थ्य सम्बन्धि कारणले व्यक्तिले औठाछाप दिन नसक्ने अवस्था रहेको खण्डमा त्यस्ता व्यक्ति औठाछाप दिनु नपर्ने सुविधाका लागि योग्य हुनसक्ने प्रावधान रहेको छ ।