कागजपत्रविहिनलाई काममा लगाउने कम्पनीलाई ३० लाख डलर जरिवाना
प्रकाशित मिति : माघ १५, २०७६ बुधबार
कागजपत्रविहिनलाई काममा लगाउने टेक्सासको एउटा कम्पनीलाई इमिग्रेशन एण्ड कस्टम इन्फोर्समेन्ट आइसले ३० लाख डलर जरिवाना गराएको छ । नर्थ टेक्सास निर्माण कम्पनीले कागजपत्रविहिनलाई गैरकानुनी रुपमा काममा राखेको आइसले फेला पारेको थियो ।
कम्पनीका संचालकहरुले काजगपत्रविहिनलाई काममा राखेर गल्ती गरेको स्वीकार गरिसकेका छन् । यदि कम्पनीले जरिवाना तिर्न नसकेको खण्डमा तीनजना मुख्य दोषीले उक्त जरिवाना तिर्नुपर्ने भएको छ ।
उक्त रकम अमेरिकी सरकारको कोषमा जानेछ भने उक्त रकम अध्यागमन कानुन कार्यान्वयनका क्षेत्रमा खर्च गरिने भएको छ । अबदेखि कम्पनीले कुनै पनि व्यक्तिलाई काममा राख्नु अगाडि ई भेरिफाइ प्रयोग गर्ने सहमति जनाएको छ ।
छानविनका क्रममा उक्त कम्पनीले कम्तीमा पनि ४३ जना कागजपत्रविहिनलाई काममा राखेको पुष्टी भएको थियो । सन् २०१८ मामात्र आइसले नेब्रास्का र मिनासोटामा विभिन्न कार्यस्थलमा छापामारेर १३३ जनालाई पक्राउ गरेको थियो ।
आइसले सन् २०१९ मा २ लाख ६७ हजार २ सय ५८ जनालाई अमेरिकाबाट देशनिकाला गरिसकेको छ । देशनिकाला गरिएकाहरुमध्ये ९१ प्रतिशतको आपराधिक रेकर्ड रहेको छ ।