अमेरिकी अध्यागमन हिराशतमा बेलायती नागरिकको मृत्यु, यस्तो छ कारण
प्रकाशित मिति : माघ १४, २०७६ मंगलबार
अमेरिकाको अध्यागमन हिराशतमा बेलायती नागरिकको मृत्यु भएको छ । फ्लोरिडाको हिराशतमा ३९ बर्षका बेलायती नागरिकको मृत्यु भएको हो । झुण्डिएका कारण अक्सिजनको कमी भएर उनको मृत्यु भएको प्रारम्भिक रिपोर्टमा जनाइएको छ ।
बेलायती विदेश मन्त्रालयका प्रवक्ताले फ्लोरिडामा मृत्यु भएका बेलायती नागरिकको बारेमा अमेरिकी अधिकारीहरुसँग सम्पर्कमा रहेको बताएका छन् । उनकी पत्नीसँग पनि सम्पर्कको प्रयास भइरहेको जनाइएको छ ।
मृतकको नाम बेन जेम्स ओवेन रहेको जनाइएको छ । उनको मृत्यु फ्लोरिडाको बेकर काउन्टी डिटेन्सन सेन्टरमा भएको जनाइएको छ ।
ती बेलायती नागरिक गतबर्षको जुलाईमा भिजिटर भिसामा अमेरिका आएका थिए । उनीमाथि अरुलाई पिछा गरेको, अरुको आवागमन स्वतन्त्रतामाथि दख्खल दिएको, घरेलु आक्रमण गरेको लगायतका कैयन अभियोगमा गिरफ्तार गरिएको थियो ।
आर्थिक बर्ष २०२० सुरु भएयता अमेरिकी अध्यागमन हिराशतमा भएको यो पाँचौं मृत्यु हो । आर्थिक बर्ष २०१९ मा अमेरिकी अध्यागमन हिराशतमा ९ जनाको मृत्यु भएको थियो ।
आर्थिक बर्ष सन् २०१९ मा आइसले ५ लाख १० हजार ८ सय ५४ जनालाई हिराशतमा लिएको थियो । जुन अघिल्लो बर्षको तुलनामा निकै बढी हो । सन् २०१८ मा आइसले ३ लाख ९६ हजार ४ सय ४८ लाई हिराशतमा लिएको थियो ।