एनआरएन नागरिकताबारेको कानुन आउन ढिलो भएकोप्रति प्रधानमन्त्रीको ध्यानाकर्षण
प्रकाशित मिति : माघ १३, २०७६ सोमबार
प्रधानमन्त्री के.पी. शर्मा ओलीले गैरआवासीय नेपालीहरुका माग सम्बोधनका लागि सरकार प्रतिबद्ध रहेको बताउनुभएको छ ।
प्रधानमन्त्री निवास, बालुवाटारमा गैरआवासीय नेपाली संघका अध्यक्ष कुमार पन्तले गर्नुभएको भेटमा प्रधानमन्त्री ओलीले गैरआवासीय नेपालीहरुको नागरिकता सम्बन्धी विधेयक संसदीय प्रक्रियामा रहेको र त्यसलाई छिट्टै टुंगो लगाइने आश्वासन दिनुभएको छ ।
भेटमा प्रधानमन्त्री ओलीसमक्ष दोस्रो विश्व गैरआवासीय नेपाली ज्ञान सीप सम्मेलन, गैरआवासीय नेपालीले नेपालमा गर्ने १० अर्ब रुपियाँकोे सामूहिक लगानी कोषको तयारी लगायतका विषयमा अध्यक्ष पन्तले जानकारी गराउनुभएको थियो ।
‘नागरिकता ऐन बन्दैमा यो एजेण्डा सकिदैन’ : कुमार पन्त, अध्यक्ष, गैर आवासीय नेपाली संघ
करिब एक घण्टाको भेटमा गैरआवासीय नेपाली समुदायको चासो र सरोकारका विषयमा विस्तारमा छलफल भएको एनआरएनए अध्यक्ष कुमार पन्तले जानकारी दिनुभयो । पन्तका अनुशार गैरआवासीय नेपाली नागरिकतासम्बन्धी कानुन संसदबाट पारित गर्न भइरहेको ढिलाइप्रति उहाँको ध्यानाकर्षण गराइएको थियो ।
दोस्रो विश्व गैरआवासीय नेपाली ज्ञानसीप सम्मेलन तथा गैरआवासीय नेपालीको सामूहिक लगानी कोषको तयारीका बारेमा पनि छलफल भएको जनाइएको छ । एनआरएनका चासो र सरोकारप्रति प्रधानमन्त्रीले आफू सकारात्मक रहेको बताउनुभएको छ ।
वैदेशिक रोजगारीमा रहनुभएका श्रमिकको हितका निम्ति स्थापित कल्याणकारी कोष वृद्धि गर्न संघले गरेको पहलप्रति प्रधानमन्त्रीको विशेष चासो रहेको र त्यसमा नीतिगत सहजताका निम्ति सघाउने वचन दिनुभएको अध्यक्ष पन्तले जानकारी दिनुभयो ।