अमेरिकामा बच्चा जन्माउन आउने गर्भवती महिलालाई भिसा रोक्ने नियमको घोषणा
प्रकाशित मिति : माघ ९, २०७६ बिहीबार
अमेरिकी सरकारले अमेरिकामा बच्चा जन्माउन आउने गर्भवती महिलालाई भिसा रोक्ने नियमको घोषणा गरेको छ । शुक्रबारदेखि लागु हुने नयाँ नियम अनुशार गर्भवती महिलाहरुलाई अमेरिकाको भिजिटर भिसा पाउन मुस्किल हुनेछ ।
नयाँ नियम बुधबार विश्वभरका दूतावासहरुमा पठाइसकिएको छ भने बच्चा जन्माउनका लागि अमेरिका आउनेहरुकालागि अमेरिकी विदेशमन्त्रालयले अब भिजिटर भिसा जारी नगर्ने ह्वाइट हाउसले घोषणा गरेको छ । यद्यपी कन्सुलर अधिकारीहरुले भिसा आवेदकलाई सिधै गर्भवती भए नभएकोबारे भने सोध्न पाउने छैनन् ।
नियमको पूर्ण पाठ हेर्न यहाँ क्लिक गर्नुहोला ।
भिसा आवेदक गर्भवती भएको र अमेरिकामा बच्चा जन्माउनको लागि आउन लागेको सन्दर्भमा निश्चित प्रकारका कारण आफूसँग नभएसम्म कन्सुलर अधिकारीहरुले आवेदकलाई गर्भवती भए नभएको सोध्न नहुने र भिसा नोटमा त्यस्तो कुनै कारण समावेश गर्नुपर्ने दूतावासहरुलाई पठाइएको निर्देशनमा उल्लेख छ । अर्थात् भिसा अस्वीकृत भएको खण्डमा भिसा अस्वीकार गर्ने अधिकारीले त्यसको कारणबारे भिसा नोटमा उल्लेख गर्नुपर्नेछ ।
भिसा अधिकारीहरुलाई दिइएको निर्देशनमा भनिएको छ – ‘तपाईंले सबै महिला आवेदकहरूलाई तिनीहरू गर्भवती भएको वा हुन चाहेको विषयमा कुनै प्रश्न सोध्नु हुँदैन ।’
तर उपयुक्त कारण भएको खण्डमा भने भिसा अधिकारीलाई यस्तो प्रश्न गर्न छुट दिइएको छ । यदि कुनै आवेदक अमेरिकामा बच्चा जन्माउने उद्देश्यलेमात्र आउन लागेको पुष्टी भएमा त्यस्ता आवेदकको भिसा अस्वीकार हुनेछ । यो नियम बी भिसाका सन्दर्भमामात्र लागु हुनेछ ।
विगत केही बर्षमा बर्षेनी १० हजारभन्दा धेरै पर्यटक अमेरिकामा बच्चा जन्माउन आउने गरेको एउटा रिपोर्टले देखाएको थियो । सन् २०१५ मा त अमेरिकामा बच्चा जन्माउन आउनेहरुलाई प्याकेजमा उपलब्ध गराइने होटल र अपार्टमेन्टमा समेत छापा मारिएको थियो ।
अमेरिकामा जन्मने जो कोहीपनि अमेरिकी नागरिक हुने प्रावधानका कारण यो प्रावधानका बिरुद्ध अमेरिकी राष्ट्रपति डोनाल्ड ट्रम्पले बेलाबेलामा बोल्दै आएका छन् । संविधान अन्तरगत नै यो प्रावधान रहेकाले तत्काल अन्त्य गर्न असम्भव भएकाले यसका नियमहरु कडाई गरिएको हो ।
सन् २०१२ को एउटा तथ्यांक अनुशार ३६ हजार विदेशी नागरिकले अमेरिकामा बच्चा जन्माएपछि अमेरिका छाडेर गएका थिए । अमेरिकालाई बच्चा जन्माउने पर्यटकीय गन्तब्य बनाउनबाट रोक्न नयाँ नियम ल्याइएको अमेरिकी विदेशमन्त्रालयका एकजना प्रवक्ताले बताएका छन् ।
हालै बच्चाको अमेरिकी नागरिकताका लागि अमेरिकी भूमि साइपनमा बच्चा जन्माउन आउन लागेको आशंकामा एकजना पर्यटकलाई विमान चढ्नु अगाडि विमानस्थलमा गर्भवती भए नभएको जाँच गरिएको थियो । पछि एयरलाइन्सले यसबारे माफी माग्दै गर्भवति भए नभएको चेक गर्ने प्रणाली नै खारेज गरिएको जनाएको थियो ।