अमेरिकामा गर्भवती महिलालाई भिसामा कडाई गरिदै, नियम बिहिबार प्रकाशित हुने
प्रकाशित मिति : माघ ८, २०७६ बुधबार
सन्तानको अमेरिकी नागरिकता प्राप्तीका लागि अमेरिकामा भिजिटर भिसामा आएर बच्चा जन्माउने क्रम बढेको भन्दै अमेरिकी सरकारले गर्भवती महिलालाई अमेरिकाको भिसामा कडाई गर्ने तयारी गरेको छ । अमेरिकी सरकारको विदेशमन्त्रालयले बिहिबार यस्तो नियम प्रकाशित गर्ने तयारी गरेको एसोसिएटेड प्रेसले दावी गरेको छ ।
नयाँ नियमपछि गर्भवति महिलालाई भिजिटर भिसामा अमेरिकाको यात्रा गर्न मुस्किल हुने जनाइएको छ । यदि गर्भवति महिलाले अमेरिकाको भिजिटर भिसाको लागि आवेदन दिएमा अमेरिका आउनुको उपयुक्त कारणबारे कन्सुलर अफिसरहरुलाई मनाउन सक्नुपर्नेछ ।
अमेरिकामा जन्मने जो कोहीपनि अमेरिकी नागरिक हुने प्रावधानका कारण यो प्रावधानका अन्त्यका लागि अमेरिकी राष्ट्रपति डोनाल्ड ट्रम्पले बेलाबेलामा बोल्दै आएका छन् । संविधान अन्तरगत नै यो प्रावधान रहेकाले तत्काल अन्त्य गर्न असम्भव भएकाले यसका नियमहरु कडाई गर्ने तयारी गरिएको हो ।
अहिलेसम्म कन्सुलर अफिसरहरुलाई भिसा अन्तरवार्ताको बेलामा आवेदक गर्भवति भए नभएकोबारे सोध्न भनिएको छैन । तर उनीहरुले आवेदक बच्चा जन्माउनकै लागि अमेरिका आउन लागेको हो वा अन्य कुनै कारणले आउन लागेको हो भन्ने कुराको निर्धारण गर्नेछन् ।
अमेरिकामा अहिलेसम्म कति महिलाहरु बच्चा जन्माउनकै लागि आउने गरेका छन् भन्ने कुनै तथ्यांक छैन । तर सन् २०१२ को तथ्यांक अनुशार ३६ हजार विदेशी नागरिकले अमेरिकामा बच्चा जन्माएपछि अमेरिका छाडेर गएका थिए । अमेरिकालाई बच्चा जन्माउने पर्यटकीय गन्तब्य बनाउनबाट रोक्न नयाँ नियम ल्याउन लागिएको अमेरिकी विदेशमन्त्रालयका एकजना प्रवक्ताले बताएका छन् ।
हालै बच्चाको अमेरिकी नागरिकताका लागि अमेरिकी भूमि साइपनमा बच्चा जन्माउन आउन लागेको आशंकामा एकजना पर्यटकलाई विमान चढ्नु अगाडि विमानस्थलमा गर्भवती भए नभएको जाँच गरिएको थियो । पछि एयरलाइन्सले यसबारे माफी माग्दै गर्भवति भए नभएको चेक गर्ने प्रणाली नै खारेज गरिएको जनाएको थियो । हङकङबाट अमेरिकी आइल्याण्ड साइपन आउँदैगरेकी २५ बर्षकी जापानी युवतीको विमानस्थलमा गर्भजाँच गरिएको थियो ।
अमेरिकी आइल्याण्ड साइपनमा जन्मिने बच्चा अमेरिकी नागरिक हुन पाउने प्रावधान भएका कारण ती जापानी युवती पनि बच्चा जन्माउन आउन लागेको हुनसक्ने आशंका गर्दै गर्भजाँच गरिएको थियो । तर उनी आफ्ना बाबुआमालाई भेट्न साइपन आउन लागेकी थिइन् ।
मिदोरी निसिदा नामकी युवतीलाई सुरुमा केही प्रश्नावलीहरु दिएर जवाफ दिन भनिएको थियो, जसमा गर्भवती भए नभएकोबारेको पनि प्रश्न रहेको थियो । पछि हङकङ एक्सप्रेस एवरवेजका कर्मचारीले उनलाई रयाण्डम फिट टु फ्लाईका लागि परीक्षण गर्न छानिएको बताएका थिए ।
त्यसपछि उनलाई ट्वाइलेटमा लगेर गर्भवती भए नभएको जाँच गर्ने एउटा फित्तामा पिसाव फेर्न लगाइएको थियो । साइपनले पर्यटकहरु आएर अमेरिकी नागरिकताका लागि बच्चा जन्माउने विषयमा कडाई गरेका कारण साइपनको चासोलाई सम्बोधन गर्न एयरलाइन्सले यसो गरेको जनाइएको थियो ।
सन् २०१८ मा नर्दन मेरियाना आइल्याण्डमा त्यहाँका बासिन्दालेभन्दा धेरै विदेशी पर्यटकहरुले बच्चा जन्माएका थिए । साइपन उक्त आइल्याण्डको सबैभन्दा ठूलो आइल्याण्ड हो । यो आइल्याण्ड पछिल्लो बर्षमा कैयन पर्यटकका लागि बच्चा जन्माउने गन्तब्य बनेको छ ।
गर्भवती पर्यटकहरुलाई अमेरिका र अमेरिकी भूभागमा यात्रा गर्नका लागि प्रतिबन्ध लगाइएको छैन । तर अधिकारीहरुले यदि यात्रा गर्नुको उद्देश्यबारे झुठो बोलेको पाएमा त्यस्ता व्यक्तिलाई विमानस्थलबाटै फर्काउन समेत सक्ने प्रावधान छ ।
त्यस्तै बच्चा जन्माउने लगायतका मेडिकल प्रकृयाका लागि तिर्न प्रयाप्त रकम भएको प्रमाणित गर्न नसक्नेहरुलाई समेत विमानस्थलबाट फर्काउन सक्छन् ।
जापानी युवतीले यस्तो परीक्षण अनिवार्य छ भनेर प्रश्न समेत गरेकी थिइन् । जवाफमा एयरलाइन्सका कर्मचारीहरुले यस्तो परीक्षण अनिवार्य नभएको तर परीक्षण नगरे विमानमा चढ्न नदिइने बताएका थिए । त्यसपछि उनले बाध्य भएर परीक्षणका लागि अनुमति दिएकी थिइन् ।
परीक्षणका क्रममा गर्भवती नभएको पाइएपछि उनलाई विमान चढ्न दिइएको थियो ।
सन् २००९ यता साइपन समेत रहेको नर्दन मेरियाना आइल्याण्डमा चिनिया पर्यटकहरुलेमात्र ३०२३ बच्चा जन्माएका छन् । गतबर्ष पर्यटकहरुले त्यहाँ ५८२ बच्चा जन्माएका थिए, जब कि गतबर्ष त्यहीका बासिन्दाले जम्मा ४९२ बच्चा जन्माएका थिए ।