अमेरिकी नागरिकताको परीक्षा प्रणाली परिवर्तन गरिदै, डिसेम्बरपछि आवेदन दिनेहरु प्रभावित
प्रकाशित मिति : माघ २, २०७६ बिहीबार
अमेरिकाले नागरिकताका लागि लिइने परीक्षा प्रणालीमा परिवर्तन गर्न लागेको छ । आवदेकको अमेरिकाबारेको ज्ञान जाँच्नका लागि लिइने परीक्षामा युएससीआईएसले परिवर्तनको तयारी गरेको हो ।
गत मे महिनामा युएससीआईएसका निर्देशकले नागरिकताका लागि लिइने परीक्षामा पुनरावलोकनको एउटा मेमोमा हस्ताक्षर गरेका थिए । सम्भावित नयाँ नागरिकहरुलाई अमेरिकी नागरिकताको अर्थ बुझाउन परीक्षा प्रणालीमा सुधारको आवश्यकता रहेको युएससीआईएसका कार्यकारी निर्देशक केन कुसिनेलीले जनाएका छन् ।
सन् २०१८ को डिसेम्बरमा युएससीआईएसले अमेरिकी परीक्षा पुनरावलोकन समुह बनाएको थियो । उक्त समुहले अहिले नागरिकताका लागि सोधिने प्रश्नहरुको पुनरावलोकन गरिरहेको युएससीआईएसले जनाएको छ । नागरिकताको परीक्षामा अँग्रेजी बोल्ने परीक्षणको पनि पुनरावलोकन भइरहेको जनाइएको छ ।
नयाँ परीक्षा प्रणाली सन् २०२० को डिसेम्बरसम्म लागु गरिने युएससीआईएसले लक्ष्य लिएको छ । अमेरिकाको अध्यागमन एवं राष्ट्रियता ऐनको सेक्सन ३१२ मा अमेरिकी नागरिकता प्राप्त गर्नका लागि अमेरिकाका बारेमा ज्ञान भएको तथा सामान्य अँगे्रजी बोल्न, लेख्न र पढ्न सक्ने हुनुपर्ने प्रावधान रहेको छ ।
अमेरिकी नागरिकताका लागि विभिन्न १ सय वटा प्रश्नहरुमध्ये अन्तरवार्ताका क्रममा १० वटा प्रश्नहरु सोधिन्छ । जसमध्ये आवेदकले ६ वटा प्रश्नको सही जवाफ दिनुपर्ने हुन्छ । अमेरिकी सरकार, अमेरिकाको इतिहास र भुगोल, बिदा लगायतका अमेरिकाकाबारेमा प्रश्नहरु तयार गरिएको हुन्छ । सन् २००८ मा प्रश्नावलीको अन्तिमपटक पुनरावलोकन गरिएको थियो ।
अमेरिकी नागरिकताको अन्तरवार्ता ९० प्रतिशतले उत्तिर्ण गर्ने तथ्यांक रहेको छ । अन्तरवार्ताका क्रममा सोधिने सबै प्रश्नहरु सजिला भने हुँदैनन् ।