इरानलाई सहयोग र समर्थन गर्नेहरुलाई अमेरिकामा प्रवेश निषेध गर्न कार्यकारी आदेश


प्रकाशित मिति : पुस २९, २०७६ मंगलबार

इरानका केही उद्योगधन्दासँग सम्बन्धितलाई अमेरिकामा प्रवेश निषेध गर्न राष्ट्रपति डोनाल्ड ट्रम्पले कार्यकारी आदेश जारी गरेका छन् । मंगलबार जारी कार्यकारी आदेशमा इरानलाई विश्वको सबैभन्दा ठूलो आतंकवादको प्रायोजक भएको आरोप लगाइएको छ ।

इरानको अर्थतन्त्रमा योगदान दिनेगरी निर्माण, उत्पादन, टेक्सटाइल, खानी लगायतका क्षेत्रमा काम गर्ने उद्योगधन्दा चलाउनेहरुलाई अमेरिकामा प्रवेश निषेध गरिएको छ । त्यस्तै इरानमा सामान निर्यात गर्नेहरुलाई समेत अमेरिकामा प्रवेश निषेध गरिएको छ ।

आर्थिक वा अन्य कुनै पनि किसिमले प्राविधिक सेवा वा सहयोग गर्नेहरुमाथि पनि यस्तो प्रतिबन्ध लाग्नेछ । इरानको सरकारलाई गरेको सहयोग भन्नाले इरानको सरकारका कुनै राजनीतिक अंगहरु, एजेन्सी लगायत त्यहाँको केन्द्रीय बैंकसमेतलाई जनाउनेछ ।

अमेरिका र इराकबीच बढेको पछिल्लो तनावकै बीचमा अमेरिकी राष्ट्रपति डोनाल्ड ट्रम्पको यो कार्यकारी आदेश आएको हो । यो कार्यकारी आदेशले इरानको समर्थन गर्ने अन्य देशका व्यक्तिलाई समेत असर गर्ने विश्लेषण गरिएको छ ।

इरानका सैन्य अधिकारीको अमेरिकी कारवाहीमा मृत्यु भएपछि दुईदेशबीचको तनाव उत्कर्षमा पुगेको छ । यसैबीचमा इरानले गल्तीवश यात्रुबाहक विमानमा रकेट हानेपछि इरानीहरु त्यहाँको सरकारको विपक्षमा प्रदर्शनमा उत्रिएका छन् ।

सरकार विरोधी प्रदर्शनहरुलाई अमेरिकाले भने नैतिक समर्थन गर्दैै आएको छ । अमेरिकी विदेशमन्त्री र विदेशमन्त्रालयले सरकार विरोधी आन्दोलनलाई जायज बताउँदै आएका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com