अमेरिकामा एसाइलम खोज्नेलाई होण्डुरस पठाउने दुईदेशबीच सहमति
प्रकाशित मिति : पुस २५, २०७६ शुक्रबार
अमेरिकामा एसाइलम खोज्ने तेश्रो मुलुकका नागरिकलाई होण्डुरस पठाउने सन्दर्भमा दुईदेशबीच सहमति कायम भएको छ । डिपार्टमेन्ट अफ होमल्याण्ड सेक्युरिटीका कार्यवाहक सेक्रेटरी चाड वल्फको होण्डुरस भ्रमणको क्रममा दुईदेशबीच सहमति कायम भएको हो ।
यो सहमति छिट्टै लागु हुने जनाइएको छ । आगामी केही सातामा नै सहमति लागु हुने बताइएपनि मिति भने किटान गरिएको छैन । यसभन्दा अगाडि नै अमेरिकाले ग्वाटेमालासँग यस्तो सहमति कायम गरिसकेको छ । जस अनुशार नोभेम्बरदेखि होण्डुरस र एल साल्भाडोरका नागरिकलाई ग्वाटेमाला पठाउन सुरु गरिसकेको छ ।
यसैसाता अमेरिकाले एसाइलम खोज्ने मेक्सिकनहरुलाई समेत ग्वाटेमाला पठाउने योजना रहेको बताएको छ । तर ग्वाटेमालाका राष्ट्रपतिले भने मेक्सिकनहरुलाई आफ्नो देशमा लिने विषयमा अमेरिकासँग कुनै सहमति नभएको बताएका छन् ।
अहिलेसम्म अमेरिकी सिमाक्षेत्रमा आएर एसाइलम दावी गर्ने ९४ जनालाई अमेरिकाले ग्वाटेमाला पठाइसकेको छ । त्यसमध्ये जम्मा ६ जनालेमात्र ग्वाटेमालामा एसाइलम दावी गरेका छन् ।