राष्ट्रसंघको कार्यक्रममा आउन इरानका विदेशमन्त्री सहितलाई अमेरिकाबाट भिसा अस्वीकार
प्रकाशित मिति : पुस २२, २०७६ मंगलबार
राष्ट्रसंघको सुरक्षा परिषदमा सम्बोधनका लागि आउन लागेका इरानका विदेशमन्त्री मोहम्मद जाभेद जरिफसहितलाई अमेरिकाले भिसा दिन अस्वीकार गरेको छ । उनीहरु इराकमा अमेरिकी आक्रमणमा मारिएका इरानी सैन्य अधिकारीबारे राष्ट्रसंघमा सम्बोधन गर्न आउने योजनामा रहेका थिए ।
सन् १९४७ मा भएको राष्ट्रसंघ मुख्यालय सम्बन्धि एउटा सम्झौतामा राष्ट्रसंघका कार्यक्रममा भाग लिन आउनका लागि अमेरिकाले विदेशी अधिकारीहरुलाई भिसा दिनुपर्ने उल्लेख छ । तर अमेरिकाले उक्त सम्झौताको उल्लंघन गरेर इरानी कुटनीतिज्ञहरुलाई भिसा नदिएको जनाइएको छ ।
आगामी जनवरी ९ मा हुने सुरक्षा परिषदको बैठकमा भाग लिनका लागि इरानी विदेशमन्त्रीले अमेरिकी भिसाका लागि आवेदन दिएका थिए । बिहिबार हुने उक्त बैठकमा अमेरिकी राष्ट्रपति डोनाल्ड ट्रम्पको निर्देशनमा भएको आक्रमणबारे इरानी विदेशमन्त्रीलाई विश्व समुदायसमक्ष प्रत्यक्ष सम्बोधन गर्ने अवशर प्रदान गरिन लागेको थियो ।
ट्रम्प प्रशासनले संयुक्त राष्ट्रसंघका महासचिव एन्टोनियो गुटिरेजलाई फोन गरेर इरानका विदेशमन्त्रीलाई अमेरिका प्रवेशका लागि भिसा दिन नसक्ने जानकारी गराइसकेकोछ । पछिल्लो समयमा इरान र अमेरिकाबीच बढेको तनावका कारण दुबै देशहरु जस्तालाई तस्तैको रणनीतिमा लागेका छन् ।