‘एनआरएनएमा भ्रष्टाचारको छुट कसैलाई छैन, अनुसन्धान सुरु भइसक्यो’ : कुमार पन्त, अध्यक्ष, एनआरएनए
प्रकाशित मिति : मंसिर २८, २०७६ शनिबार
एनआरएनए अध्यक्ष कुमार पन्तले संस्थामा भ्रष्टाचारको छुट कसैलाई पनि नभएको स्पष्ट पार्नुभएको छ ।
एनआरएनएमा भ्रष्टाचारका विषयहरु पनि उठेको सन्दर्भमा खसोखाससँग कुराकानी गर्दै उहाँले भन्नुभयो – ‘सामाजिक संस्थामा आर्थिक पारदर्शिता हुनुपर्छ । खाडी मुलुकमा बस्ने नेपालीहरुले रगत पसिना बगाएर एकएक सेन्ट, डलर जम्मा गरेर दिएको पैसामा खेलवाड गर्ने, त्यो पैसामा भ्रष्टाचार गर्ने छुट कसैलाई पनि छैन । त्यो हुन दिइने छैन । आर्थिक पारदर्शितालाई एकदमै प्राथमिकतामा राखेर मैले काम गरिरहेको छु ।’
विभिन्न संचारमाध्यममा आएका आरोपहरु साँचो नभएको र आफूहरुले अनुसन्धान पनि सुरु गरिसकेको उहाँको भनाई छ । उहाँले भन्नुभयो – ‘यसभन्दा अगाडिको कार्यकालमा पनि हामी थियौं । हामीले त्यतीबेला गरेका काम पारदर्शी थिए कि थिएनन् भन्नेबारे अनुसन्धान गर्न थालिसकेका छौं ।’
‘अडिटका काम भइरहेका छन् । काठमाडौंमा रहेका हाम्रो अफिसमा गएर हेर्ने हो भने दुईतीनवटा कोठामा अडिटका काममात्र भइरहेका छन् ।’ – पन्तले बताउनुभयो ।
गैर आवासी नेपालीहरुको यति धेरैले विश्वास गरेको संस्थामा बसेर भ्रष्टाचार गर्न खोज्छ भने त्यसलाई छुट नदिइने र कँही कतै केही भएका छन् कि भनेर आफूहरुले खोज्न थालेको उहाँको भनाई छ । उहाँले भन्नुभयो – ‘तर मिडियामा आएकोजस्तो व्यापक भ्रष्टाचारको कुरा सत्य होइन । त्यसमा विश्वास नगर्न आग्रह गर्दछु ।’
‘यदि भ्रष्टाचार भएको भए म आफै भन्नेछु । यहाँभित्र भ्रष्टाचार भएको रहेछ, यसरी यसरी यो यो व्यक्तिले भ्रष्टाचार गरेको रहेछ भनेर म आफै भन्छु । यस्ता मान्छेलाई कारवाही हुनुपर्छ भनेर म आफै अगाडि बढ्छु ।’- पन्तले भन्नुभयो ।
कतिपयले एनआरएनएलाई कमजोर बनाउन गलत प्रचारवाजी गरिरहेको उहाँको भनाई छ । विना प्रमाण एनआरएएनमा भ्रष्टाचार भएको थियो भन्नु हतार र पूर्वाग्रहपूर्ण हुने उहाँले बताउनुभयो ।
उहाँले भन्नुभयो – ‘मैले सचिवालयलाई दिनदिनै फोन गरेर आर्थिक पारदर्शिता पहिलो प्राथमिकतामा राख्नुपर्छ भनिरहेको छु । हरेक सेन्टको र रुपैयाको हिसाब चाहिन्छ भनेको छु । सचिवालयमा एककप चिया पिएपनि हिसाब चाहिन्छ भनेको छु । हाम्रो कोषाध्यक्षले त्यसरी नै काम गर्नुभएको छ ।’
‘आर्थिक पारदर्शितालाई मुख्य प्राथमिकतामा राखेर काम गरिदैछ । यदि एनआरएनएभित्र कसैले भ्रष्टाचार गरेको छ भने त्यसलाई छाडिदैन । त्यसैले साथीहरुलाई म धैर्यधारण गर्न आग्रह गर्छु । ‘ – अध्यक्ष पन्तले जोड दिनुभयो ।
अध्यक्ष पन्तसँग खसोखासले गरेको विशेष कुराकानी यहाँ पढ्नुहोला ।
‘सिमा अतिक्रमणको विषय अन्तर्राष्ट्रियकरण गर्छौं, अन्तर्राष्ट्रिय अदालतसम्म पनि पुग्न सक्छौं’