हत्याको अनुसन्धान गर्दा सरकारी कर्मचारीकै पोल खुल्यो !

मृतक जुनेदको अपहरण तथा ज्यान लिएको अभियोगमा मुद्दा खेपि दुईसातादेखि जिल्ला प्रहरी कार्यालयको नियन्त्रणमा रहेका नेपालगन्जका खैरुल हसन अन्सारीको बयान र मृतकको घरमा फेला परेको ढड्डाका आधारमा बांके र बर्दियाका गरि कम्तीमा ८ जना कर्मचारीलाई प्रहरीले पक्राउ गरेको छ ।
मृतक जुनेदको घरबाट मालपोत कार्यालय बाँकेको सरकारी लिखत भएको प्रमाणित ढड्डा फेला पारेको जिल्ला प्रहरी कार्यालय बाँकेका प्रमुख प्रहरी उपरीक्षक अरुण पौडेलले स्विकार गरेका छन् ।भूमि सुधार तथा मोलपोत कार्यालय बाँकेको ढड्डा ब्यक्तिको घरमा फेला परेको छ । सोही ढड्डाको आधारमा जिल्ला प्रहरी कार्यालय बाँकेले सरकारी कागज किर्ते गरेको अभियोगमा मालपोत कार्यालय बाँकेका ६ जना र दुईजना बर्दियाबाट पक्राउ गरेको छ । ढड्डामा सरकारी जग्गाको श्रेष्ता समेत फेला परेपछि प्रहरीले सरकारी कागज किर्तेको विषयमा थप अनुसन्धान अघि बढाउँदै संलग्न देखिएका कर्मचारीलाई पक्राउ गरेको हो ।

बाँकेका दुईजना लेखनदारलाई समेत प्रहरीले पक्राउ गरेको छ । पक्राउपर्नेमा मालपोत कार्यालय बाँकेका नासु रामबहादुर खड्का, रुद्र देवकोटा र टंक शर्मा तथा कम्प्यूटर कर्मचारी यज्ञश्वर वली र प्रेमचन्द्र ठकुरी रहेकाछन् । यसैगरी लेखनदार विरबहादुर खड्का पनि पक्राउ परेका छन् । प्रहरीले मालपोत कार्यालय बाँकेका पुर्ब अधिकृत हाल जिल्ला हुलाक कार्यालय बाँकेका अधिकृत पुष्पा श्रेष्ठलाई समेत पक्राउ गरेको छ भने भूमि सुधार तथा मालपोत कार्यालय बर्दियाका नासु कृष्णलाल शर्मा र खरिदार भूमिराज पोख्रेल समेत प्रहरी नियन्त्रणमा परेकाछन् ।
हत्याको अनुसन्धानका क्रममा सरकारी जग्गा ब्यक्तिको नाममा दर्ता गर्न सरकारी कागजाद किर्ते गरेको फेला परेको प्रहरी उपरिक्षक पौडेलले बताउनु भयो ।
प्रहरीका अनुसार नेपालगञ्जमा बस्दै आएका भारतीय नागरिक जुनेद अन्सारी र खैरुल हसन अन्सारीले जग्गाको कारोबार गर्दै आएका थिए । करिब डेढ महिना पहिले जुनेद सम्पर्कविहिन भएका थिए । हराएको भोलीपल्टै भारतमा शव भेटिएको थियो । जुनेदले लगाएको कपडाको आधारमा परिवारले शवको सनाखत गरेको थियो । मृतक जुनेदका परिवारका तर्फबाट घर जग्गाका साझेदार खैरुलको विरुद्धमा जिल्ला प्रहरी कार्यालय बाँकेमा अपहरण तथा ज्यान मुद्धा दर्ता भएको थियो ।

भूमि सुधार तथा मालपोत कार्यालय बाँकेका प्रमुख प्रेम दौल्यालले आफु कार्यालय प्रमुखको रुपमा आउनु भन्दा पहिलेको घटनामा कर्मचारीलाई पक्राउ गरिएको जानकारी दिए । मालपोतका अनुसार, बागेश्वरी मन्दिर नजिकैको खाल्डो भएको जमिन करिब ५ कठ्ठा र कारकादौंमा ५ कठ्ठा १३ धुर जग्गाको कागजात किर्ते गरिएको प्रहरीको दावी छ । ठुलो संख्यमा कर्मचारी प्रहरी हिरासतमा पुगेपछि मालपोत कार्यालयको दैनीक काममा बाधा पुगेको प्रमुख दौल्यालले बताउनु भयो । घटनाको अनुसन्धान भई रहेकाले थप बिवरण दिन भने प्रहरीले अस्विकार गरेको छ ।