रेस्टुरेन्ट, शौचालय, सुत्ने कोठा भएको बस आजबाट संचालनमा
प्रकाशित मिति : फाल्गुन ७, २०७५ मंगलबार
काठमाडौं उपत्यका लगायत देशका विभिन्न क्षेहरुमा अन्तराष्ट्रिय स्तरका गाडीहरु चल्न थालेका छन् । पोखरा जगदम्बा ट्राभल्स प्रालिले बागलुङ–काठमाडौँ अति विशिष्ट (भिआइपी) बस सेवा शुरु गरेको हो । वातावरण अनुकुलित बसमा खाजा, चिया, कफी, चिसो पेयपदार्थ, निःशुल्क वाइफाइ, शौचालय आदिको सुविधा भएको जानकारी दिइएको छ ।
बीस सिट क्षमताको बस आइतबारदेखि हरेक दिन साँझ ६ः३० बजे काठमाडौँका लागि र सोही समयमा काठमाडौँदेखि बागलुङका लागि छुट्ने भएको छ । यात्रुको माग र सुविधालाई दृष्टिगत गरेर अत्याधुनिक सुविधायुक्त बस सञ्चालनमा ल्याइएको प्रालिका अध्यक्ष केशवप्रसाद अधिकारीले जनाएका छन् । उनले भने, “बागलुङमा पहिलोपटक भिआइपी बस सेवा शुरु भएको छ ।”
उनले यात्रुको सन्तुष्टी र सुरक्षाप्रति आफुहरु प्रतिबद्ध भएको समेत जनाएका छन् । धवलागिरि अञ्चल बस व्यवसायी सञ्चालक समितिमा आबद्ध भई प्रालिले बस सञ्चालन गरेको छ । बागलुङ–काठमाडौँ भाडादर १५०० तोकिएको छ ।
जसमा बसभाडाबाहेक खाजा, चिया, पानी, मनोरञ्जन, चिसो पेयपदार्थ आदिको शुल्क जोडिएको छ । यात्रुले सुत्न चाहे सयन कक्ष समेत रहेको जनाइएको छ । भित्र पुरै रेष्टुरेन्टको ब्यवस्था हुन्छ । जे खान चाहेपनि हुन्छ ।