एसाइलम खोज्ने ५२२ जना आप्रवासीहरुलाई आज टेक्सासको एल पासोमा छाडिदै
प्रकाशित मिति : पुस १२, २०७५ बिहीबार
अमेरिकामा एसाइलम खोज्ने ५ सय २२ जना आप्रवासीहरुलाई आज टेक्सासको एलपासोमा छाडिने भएको छ । इमिग्रेशन एण्ड कस्टम इन्फोर्समेन्ट आइसका अधिकारीहरुले उनीहरुलाई एलपासोका विभिन्न स्थानहरुमा छाड्न लागेका हुन् ।
उनीहरुमध्ये अधिकांशका लागि बसोबासको बन्दोबस्त गरिएको घोषणा गृह नामको गैर नाफामुलक संस्थाले जनाएको छ । गत आइतवार राती २ सय भन्दा आप्रवासीहरुलाई आइसका अधिकारीहरुले सडकमा छाडेपछि उक्त संस्थाले आज छाडिनेहरुलाई बसोबासको व्यवस्था गरेको हो ।
आइतबार ग्रेहाउण्ड बस स्टेशनबाहिर छाडिएकाहरुलाई बसोबासको कुनै व्यवस्था गरिएको थिएन । त्यसपछि उनीहरु टिकट बिना नै बस चढ्ने प्रयास गरेका थिए । प्रतिक्षालय समेत निकै सानो भएकाले कैयन आप्रवासीहरुले बाहिरको चिसोमा प्रतिक्षा गर्नुपरेको थियो । पछि चारवटा बस आएपछि उनीहरु बसमा चढेका थिए ।
क्रिसमसको दिनमा पनि १८० आप्रवासीहरुलाई एलपासोमा छाडिएको थियो । दिउसो साढे १ बजेदेखि उनीहरुलाई छाड्न थालिएको थियो । यसरी छाडिएकाहरुमध्ये अधिकांशका बच्चाबच्चीहरु रहेको जनाइएको छ ।
यसरी यो साता झण्डै १२ सय जनालाई छाडिने अधिकारीहरुले जनाएका छन् । उनीहरु अमेरिकामा शरणका लागि आवेदन दिएका आप्रवासीहरु हुन् ।
तस्वीरमा क्रिसमस इभमा बस स्टेशनमा छाडिएका आप्रवासीहरु ।