अमेरिकी अध्यागमन हिराशतमा एकमहिनामा २ बच्चाको मृत्युभएपछि तोकियो नयाँ मापदण्ड
प्रकाशित मिति : पुस ११, २०७५ बुधबार
युएस कस्टम एण्ड बोर्डर प्रोटेक्सनले एकमहिनाको अवधिमा अमेरिकी अध्यागमन हिराशतमा २ बालबालिकाको मृत्यु भएपछि हिराशतमा बालबालिकाको व्यवस्थापनबारे परिवर्तनको घोषणा गरेको छ । अब सिमा सुरक्षा गस्तीले हिराशतमा रहेका सबै बालबालिकाको दोश्रोपटक समेत स्वास्थ्यपरिक्षण गर्नुपर्ने गरी नयाँ मापदण्ड तोकिएको छ ।
खासगरी १० बर्षभन्दा कम उमेरका बालबालिकाहरुको पुन स्वास्थ्यपरिक्षण जरुरी भएको सीबीपीले निष्कर्ष निकालेको हो । अमेरिकाको सरकारी हिराशतमा क्रिसमसको दिनमा ८ बर्षका अर्का ग्वाटेमालाका बालकको पनि मृत्यु भएपछि सीबीले नयाँ मापदण्ड तोकेको हो । यसैमहिना अमेरिकाको हिराशतमा आप्रवासी बालबालिकाको मृत्यु भएको यो दोश्रो घटना हो ।
सोमबार बालक बिरामी भएको संकेत मिलेपछि न्यु मेक्सिको राज्यको अस्पतालमा लगिएको थियो । बालकलाई रुघा र ज्वरो आएको डाक्टरले बताएका थिए । त्यसपछि उनलाई एमोक्सिलिन र बुफ्रिन औषधी दिएर अस्पतालबाट डिस्चार्ज गरिएको थियो ।
रिंगटा लाग्ने र बान्ता हुने भएपछि ती बालकलाई सोमबार बेलुका पुन अस्पताल लगिएको थियो । त्यसपछि उपचारका क्रममा उनको निधन भएको थियो । बालकको मृत्युको कारण भने अहिलेसम्म नखुलेको डिपार्टमेन्ट अफ होमल्याण्ड सेक्युरिटीको इन्सपेक्टर जनरलले जनाएका छन् ।
केही दिन पछि ७ बर्षकी ग्वाटेमालाकै बालिकाको अध्यागमन हिराशतमा मृत्यु भएको थियो । ती बालिका ज्याकलिन कालको शब सोमबार उनको परिवारलाई बुझाइएको छ ।