अमेरिकामा पहिलो नेपाली कानुन व्यवसायी खगेन्द्र जीसी पाँचौंपटक सुपरलयर
प्रकाशित मिति : पुस १०, २०७५ मंगलबार
तीनदशक भन्दा लामो समयदेखि अमेरिकामा कानुन व्यवसायमा सकृय नेपाली मुलका कानुन व्यवसायी खगेन्द्र जीसी पाँचौंपटक सुपरलयर बनेका छन् । कानुन व्यवसायीहरुको रेटिङ गर्ने अमेरिकामा चर्चित सुपर लयर्स नामको रेटिङ कम्पनीले जीसीलाई सन् २०१४ देखि लगातार सुपरलयरको रेटिङमा राख्दै आएको छ । सुपरलयर्स
थोम्सन रोयटर्सले संचालन गरेको सुपर लयर्सले विभिन्न ७० वटा कानुनका क्षेत्रमा अभ्यास गर्ने कानुन व्यवसायीहरुको रेटिङ गर्दै आएको छ । सुपर लयर्सले प्रकाशित गर्ने म्यागाजिनमा छानिएका कानुन व्यवसायीहरुको प्रोफाइल समेत प्रकाशित गरिदै आएको छ ।
सुपरलयर्समा छानिनका लागि तेश्रो पार्टीले नोमिनेट गर्नुपर्ने हुन्छ । कानुन व्यवसायी आफैले आफैलाई नोमिनेट गर्न मिल्दैन । सुपर लयर्सको शोध समुहले पत्ता लगाएको खण्डमा पनि त्यो समुहले कानुन व्यवसायीलाई नोमिनेट गर्छ । यसरी विभिन्न चारवटा चरणपछि सुपरलयर्स छानिन्छ । कुल नोमिनेशनमा परेका ५ प्रतिशतलाई सुपर लयर्स र २ दशमलव ५ प्रतिशतललाई राइजिङ स्टार्स छान्ने गरिएको कम्पनीले जनाएको छ ।
सुपर लयरमा छानिएका नेपाली कानुन व्यवसायी खगेन्द्र जीसीले सन् १९८७ मा कानुन व्यवसायीको लाइन्सेस प्राप्त गरेका थिए । त्यसयता उनले हजारौं ग्रिनकार्ड र भिसाहरु स्वीकृत गराइसकेका छन् । जीसीको न्युयोर्कमा क्षेत्री एण्ड एसोसिएट्स संचालनमा रहेको छ ।
नेपाल सरकारका लागि विश्भरबाट एकमात्र एनआरएन सल्लाहकार रहेका जीसी एनआरएन आईसीसीको नागरिकताको निरन्तरतासम्बन्धि टास्कफोर्सका को चेयर हुन् । सन् २०१४ मा जीसी एनआरएन अमेरिकाको अध्यक्षमा निर्वाचित समेत भएका थिए । अमेरिकामा वकालत गर्ने पहिलो नेपाली वकिल जीसी लामो समयदेखि सामाजिक सेवामा लागिपरेका छन् ।