न्युयोर्क राज्य सिनेटमा छिर्दै १३ बर्षको उमेरमा अमेरिका छिरेकी इरानी शरणार्थी
प्रकाशित मिति : मंसिर २५, २०७५ मंगलबार
न्युयोर्क राज्य सिनेटमा विजयी ५३ बर्षीय अन्ना कप्लान १३ बर्षको उमेरमा अमेरिकामा इरानी शरणार्थीका रुपमा आएकी थिइन् । अमेरिकामा राजनीतिमा होमिएकी उनी आगामी महिना न्युयोर्कको राज्य संसदको बैठकमा हुनेछिन् ।
कप्लान इरानमा भएको राजनीतिक हिंशाका कारण सन् १९७९ मा त्यहाँबाट भागेर अमेरिका आएकी थिइन् । उनी त्यही बर्ष इरान छाडिन्, जुन बर्ष शाहले श्रीपेच छाडेका थिए भने तेहरानमा इस्लामिक क्रान्तिले नयाँ सरकार बनाएको थियो ।
कप्लान र उनको परिवार यहुदी परिवारको थियो । उनका बुबाआमा नयाँ शासनबाट त्रसित थिए । त्यहाँबाट भागेर उनी र उनका दाजु अमेरिका आइसकेपछि एसाइलम दावी गरे । उनका बुबाआमा पनि १ बर्षपछि अमेरिका आए ।
गत महिना भएको चुनावमा उनी ७ औं डिस्ट्रिक्टका रिपब्लिकन उम्मेदबारलाई पराजित गर्दै न्युयोर्क राज्यको सिनेटमा निर्वाचित हुने पहिलो इरानी आप्रवासी बनिन् । आगामी महिना सुरु हुने सिनेटमा उनी नयाँ सिनेटर हुनेछिन् । तर उनी राजनीतिमा भने नयाँ होइनन् ।
उनले सन् २०११ देखि टाउन अफ नर्थ हेम्पस्टेडमा काउन्सिलवुमनका रुपमा काम गरेकी थिइन् । सन् २०१६ मा कँग्रेस सदस्यमा उम्मेदवारी दिएपनि उनी विजयी हुन सकिनन् ।