डोनाल्ड ट्रम्पको न्युजर्सी रिसोर्टमा कागजपत्रविहिनहरु काममा
प्रकाशित मिति : मंसिर २३, २०७५ आईतबार
अमेरिकी राष्ट्रपति डोनाल्ड ट्रम्पको न्युजर्सीमा रहेको रिसोर्टमा २ जना कागजपत्रविहिन महिलाहरुलाई काममा राखिएको खुलासा भएको छ । रिसोर्टमा कोठामा सरसफाईको काम गर्ने २ जना महिलाहरुको कागजपत्र नभएको सुपरभाइजरलाई समेत थाहा भएको र सुपरभाइरजरले उनीहरुलाई बेलाबेलामा देशनिकालाको धम्की दिने गरेको न्युयोर्क टाइम्सको रिपोर्टमा उल्लेख छ ।
रिसोर्टका अरु कैयन कागपत्रविहिन कामदारहरु रहेको दावी गरिएको छ । देशनिकालाको धम्की पाएको र काम गर्ने ठाउँमा दुब्र्यबहार गरिएको भन्दै ती दुई जना महिलाहरुले ट्रम्पको रिसोर्ट व्यवस्थापनबिरुद्ध मुद्दा दायर गर्ने भएका छन् । सुपरभाइजरले उनीहरुलाई पटकपटक गधा, कुकुर जस्ता शब्दहरु प्रयोग गरेको उनीहरुको दाबी छ ।
ट्रम्पको कम्पनीले भने आफ्ना दशौं हजार कामदारहरु रहेको र नियुक्ती प्रकृया एकदमै कडा रहेको जनाएको छ । कसैले गलत कागजात पेश गरेर काम गरेको भएमा उसलाई त्यस्तो थाहा हुनासाथ निष्काशन गरिने ट्रम्पको कम्पनीले जनाएको छ ।
काम गर्ने मध्येकी एक भिक्टोरिना मोरालेसले डोनाल्ड ट्रम्प आफैले कहिलेकाँही उनलाई ५० देखि एकसय डलरसम्म टिप्स समेत दिने गरेको बताएकी छिन् । रिसोर्टमा काम गर्ने कम्तीमा १ दर्जन कामदारको कागजात नभएको मोरालेसको दावी छ ।
