एआईमा भारी लगानीबीच माइक्रोसफ्टद्वारा ६० हजार कर्मचारीलाई स्वेच्छिक अवकाशको प्रस्ताव
प्रकाशित मिति : ९ कार्तिक २०८३, सोमबार
Photo: Simon Ray/ Unsplash
आर्टिफिसियल इन्टेलिजन्स प्रविधिमा लगानी तीव्र पारिरहेको अमेरिकी सफ्टवेयर दिग्गज माइक्रोसफ्टले आफ्ना करिब ६०,००० कर्मचारीहरूलाई स्वेच्छिक अवकाशको प्रस्ताव गरेको छ। यो सङ्ख्या कम्पनीको कुल विश्वव्यापी जनशक्तिको करिब २७ प्रतिशत हो।
सोमबार प्रकाशित एक ब्लग पोस्टमा माइक्रोसफ्टकी मुख्य जनशक्ति अधिकृत एमी कोलम्यानले यो योजना अमेरिका, क्यानडा, बेलायत र भारतका योग्य कर्मचारीहरूका लागि उपलब्ध गराइएको जानकारी दिएकी छन्।
स्वेच्छिक अवकाशको यो योजना हाम्रा लागि नयाँ प्रयोग हो, कोलम्यानले लेखेकी छन्, हामी यसबाट धेरै कुरा सिक्नेछौँ। यसका साथै, हामी हाम्रा कर्मचारीहरूलाई सबैभन्दा महत्त्वपूर्ण काममा ध्यान केन्द्रित गर्न, नयाँ सीपहरू सिक्न र सम्भव भएसम्म माइक्रोसफ्टभित्रै नयाँ अवसरहरू खोज्न निरन्तर सहयोग गरिरहनेछौँ।
जुन महिनाको अन्त्यसम्ममा माइक्रोसफ्टमा करिब २,२३,००० पूर्णकालीन कर्मचारी कार्यरत थिए। कम्पनीले बुधबार आफ्नो त्रैमासिक वित्तीय विवरण सार्वजनिक गर्दै छ। यसै महिना माइक्रोसफ्टको सेयर मूल्य ऐतिहासिक उच्च विन्दुमा पुगेको थियो भने सोमबार पनि यसको सेयरमा करिब १ प्रतिशतको वृद्धि देखिएको छ।
यसअघि मे महिनामा माइक्रोसफ्टले अमेरिकाका करिब ८,७५० कर्मचारीलाई स्वेच्छिक अवकाश दिने योजना बनाएको थियो। त्यस्तै, जुलाईमा कम्पनीले आफ्नो ‘एक्सबक्स’ भिडियो गेम व्यवसायसहित विश्वभरका करिब ४,८०० कर्मचारी कटौती गरेको थियो।
एआई प्रविधिलाई सञ्चालन गर्न आवश्यक पर्ने डाटा सेन्टर निर्माणमा यस वर्ष ७०० अर्ब डलरभन्दा बढी लगानी हुने अनुमान गरिएको छ। यसले गर्दा मेमोरी चिप्स, कम्प्युटर प्रोसेसर, अन्य उपकरण तथा विद्युत्को मूल्य बढेको छ। अर्थशास्त्रीहरूका अनुसार यस कारण यो वर्षको अन्त्यसम्म मुद्रास्फीतिमा चाप परिरहनेछ।
माइक्रोसफ्टले विगत केही वर्षदेखि आफ्नो एआई क्षमतालाई आक्रामक रूपमा विस्तार गरिरहेको छ। सन् २०२४ मा कम्पनीले ‘कोपाइलट’ नामक एआई सहायकलाई विन्डोज अपरेटिङ सिस्टममै एकीकृत गरी एआई क्षमतायुक्त व्यक्तिगत कम्प्युटरहरूको नयाँ शृङ्खला सार्वजनिक गरेको थियो।
यसैगरी, अक्टोबर २०२५ मा माइक्रोसफ्टले आफ्नो ‘कोपाइलट’ भर्चुअल सहायकको प्रतिनिधित्व गर्ने ‘मीको’नामक नयाँ कार्टुन एआई पात्र सार्वजनिक गरेको थियो।