२००% भन्दा कम आम्दानी भएका न्युयोर्कवासीलाई निःशुल्क अस्पताल उपचार
प्रकाशित मिति : ४ भदौ २०८३, बिहिबार
क्वीन्सको एल्महर्स्टमा ब्रोडवे र ७८औँ स्ट्रिटमा रहेको एल्महर्स्ट अस्पताल केन्द्र। तस्बिर: टिडोरान्टे१०, विकिमिडिया कमन्समार्फत, क्रिएटिभ कमन्स एट्रिब्युसन–सेयरअलाइक ४.० लाइसेन्सअन्तर्गत।
न्युयोर्कका महान्यायाधिवक्ता लेटिया जेम्सले बिहीबार अस्पतालको उपचार खर्च तिर्न कठिनाइ भएका बासिन्दालाई आर्थिक सहायता कसरी प्राप्त गर्ने र त्यसका लागि कसरी आवेदन दिने भन्नेबारे नयाँ मार्गदर्शन सार्वजनिक गरेकी छन्। संघीय स्वास्थ्य सेवा कटौतीका कारण न्युयोर्कका लाखौंमध्ये करिब ४ लाख ५० हजार बासिन्दाले शून्य-प्रिमियम ‘एस्सेन्सियल प्लान’को सुविधा गुमाउने अपेक्षा गरिएको अवस्थामा यो मार्गदर्शन सार्वजनिक गरिएको हो।
न्युयोर्कको कानुनअनुसार राज्यका प्रत्येक अस्पतालले आफ्नो उपचार खर्च धान्न नसक्ने योग्य बिरामीका लागि आर्थिक सहायता कार्यक्रम सञ्चालन गर्नुपर्छ। यस्ता कार्यक्रमअन्तर्गत निःशुल्क उपचार, उपचार खर्चमा छुट तथा मासिक किस्तामा रकम तिर्ने सुविधा उपलब्ध हुन सक्छ। तर, धेरै बासिन्दालाई यस्ता कानुनी संरक्षण र सहायता कसरी प्राप्त गर्ने भन्ने जानकारी नभएको महान्यायाधिवक्ताको कार्यालयले जनाएको छ।
महान्यायाधिवक्ताको कार्यालयले सार्वजनिक गरेको मार्गदर्शन मा आर्थिक सहायता पाउन आवश्यक योग्यता, आवेदन दिने प्रक्रिया तथा आप्रवासी बिरामीसहित चिकित्सा ऋणको सामना गरिरहेका व्यक्तिलाई उपलब्ध कानुनी संरक्षणबारे जानकारी दिइएको छ।
“कुनै पनि न्युयोर्कवासीले आफ्नो स्वास्थ्य र आर्थिक सुरक्षामध्ये एउटा रोज्नुपर्ने अवस्था आउनु हुँदैन,” जेम्सले भनिन्। “संघीय कटौतीका कारण लाखौं न्युयोर्कवासीले स्वास्थ्य बीमा गुमाउने अवस्थामा, अस्पतालको बिल तिर्न कठिनाइ भएका सबैलाई आफ्नो अधिकार बुझ्न र यो मार्गदर्शन प्रयोग गर्न म आग्रह गर्छु।”
को आर्थिक सहायता पाउन योग्य हुन सक्छन्?
घरपरिवारको आम्दानी संघीय गरिबी स्तरको ४०० प्रतिशतसम्म रहेका बिरामी अस्पतालको आर्थिक सहायता पाउन योग्य हुन सक्छन्। सन् २०२६ को आम्दानी मापदण्डअनुसार एक सदस्य भएको परिवारको वार्षिक आम्दानी ३१ हजार ९२० डलरभन्दा कम भएमा निःशुल्क उपचारका लागि योग्य हुन सकिन्छ भने ६३ हजार ८४० डलरसम्म आम्दानी भएकाले उपचारमा छुट पाउन सक्छन्।
दुई सदस्य भएको परिवारका लागि निःशुल्क उपचारको आम्दानी सीमा ४३ हजार २८० डलर र छुटको सीमा ८६ हजार ५६० डलर छ। तीन सदस्यीय परिवारका लागि यी सीमा क्रमशः ५४ हजार ६४० डलर र १ लाख ९ हजार २८० डलर छन्। चार सदस्यीय परिवारका लागि ६६ हजार डलर र १ लाख ३२ हजार डलर तथा पाँच सदस्यीय परिवारका लागि ७७ हजार ३६० डलर र १ लाख ५४ हजार ७२० डलरको सीमा तोकिएको छ।
घरपरिवारको आम्दानी संघीय गरिबी स्तरको २०० प्रतिशतभन्दा कम भएका योग्य बिरामीको अस्पताल शुल्क पूर्ण रूपमा मिनाहा गर्नुपर्ने व्यवस्था छ। २०० प्रतिशतदेखि ४०० प्रतिशतसम्म आम्दानी भएका बिरामीले आम्दानीअनुसार क्रमशः बढ्ने वा घट्ने दरमा उपचार खर्चमा छुट पाउन सक्छन्।
आर्थिक सहायता पाउन बीमा नभएका व्यक्ति मात्र योग्य हुने होइनन्। स्वास्थ्य बीमा भएका व्यक्तिले पनि आफ्नो बीमाबाट प्राप्त सुविधा पूर्ण रूपमा प्रयोग गरिसकेको अवस्थामा वा अघिल्लो वर्ष आफ्नो घरपरिवारको आम्दानीको १० प्रतिशतभन्दा बढी रकम उपचारका लागि आफ्नै खल्तीबाट खर्च गरेको अवस्थामा आर्थिक सहायता पाउन सक्छन्।
यो कानुनी व्यवस्था आकस्मिक उपचारका साथै चिकित्सकीय रूपमा आवश्यक अस्पताल भर्ना र बाहिरी बिरामी सेवामा पनि लागू हुन्छ। गैर-आकस्मिक उपचारका लागि भने बिरामी सामान्यतया सम्बन्धित अस्पतालले तोकेको प्राथमिक स्वास्थ्य सेवा क्षेत्रभित्र बसोबास गर्ने व्यक्ति हुनुपर्छ।
अस्पतालले बिरामी भर्ना गर्दा, दर्ता गर्दा वा डिस्चार्ज गर्दा तथा बिल वा आर्थिक विवरण पठाउँदा आफ्नो आर्थिक सहायता नीतिबारे लिखित जानकारी दिनुपर्छ। थप जानकारी न्युयोर्क राज्य स्वास्थ्य विभाग बाट पनि प्राप्त गर्न सकिन्छ।
आप्रवासी बिरामी पनि सुरक्षित
महान्यायाधिवक्ताको नयाँ मार्गदर्शनले अस्पतालले आर्थिक सहायता पाउने योग्यता निर्धारण गर्दा बिरामीको आप्रवासन अवस्था सोध्न वा त्यसलाई आधार बनाउन नपाउने स्पष्ट गरेको छ।
अस्पतालको आर्थिक सहायता माग्नु सार्वजनिक लाभ प्राप्त गरेको मानिँदैन र यसले व्यक्तिको आप्रवासन अवस्थालाई असर गर्दैन। महान्यायाधिवक्ताको कार्यालयका अनुसार अस्पतालले आर्थिक सहायता माग्ने व्यक्तिबारे आप्रवासन अधिकारीलाई जानकारी दिन पनि पाउँदैनन्।
अस्पतालको बिल नतिरेको कारण कुनै बिरामीलाई आकस्मिक वा चिकित्सकीय रूपमा आवश्यक उपचारबाट वञ्चित गर्न पाइँदैन। बिरामीको स्वास्थ्य अवस्था वा रोगका आधारमा आर्थिक सहायता सीमित गर्न वा बक्यौता चिकित्सा ऋण भएका कारण अस्पतालमा भर्ना वा उपचार अस्वीकार गर्न पनि पाइँदैन।
आवेदन र किस्ताबन्दीमा भुक्तानी
न्युयोर्कवासीले उपचार सेवा प्राप्त गरेको दिनदेखि बिलिङ तथा ऋण असुली प्रक्रियासम्म जुनसुकै समयमा आर्थिक सहायताका लागि आवेदन दिन सक्छन्। अस्पतालहरूले न्युयोर्क राज्य स्वास्थ्य विभागले तयार पारेको मानक आवेदन फाराम प्रयोग गर्नुपर्छ। उक्त आवेदन अंग्रेजीबाहेक थप १६ भाषामा उपलब्ध छ।
बिरामीले न्युयोर्क राज्य स्वास्थ्य विभागको वेबसाइट बाट आवेदन फाराम डाउनलोड गर्न, अस्पतालको आर्थिक सहायता कार्यालय वा बिलिङ विभागबाट माग्न वा सम्बन्धित अस्पतालको वेबसाइटबाट सिधै डाउनलोड गर्न सक्छन्।
अस्पतालले आवेदनका क्रममा तलबको विवरण, कर विवरण, सार्वजनिक लाभसम्बन्धी कागजात, परिवारका सदस्यको संख्या, परिचयपत्र, स्वास्थ्य बीमासम्बन्धी विवरण वा चिकित्सा बिलजस्ता कागजात माग्न सक्छ। तर, घर वा गाडी जस्ता सम्पत्तिको विवरण माग्न पाइँदैन। आवेदकले केही आवश्यक कागजात उपलब्ध गराउन नसकेको मात्र कारण देखाएर अस्पतालले स्वतः आर्थिक सहायता अस्वीकार गर्न पनि पाउँदैन।
पूर्ण आवेदन प्राप्त भएपछि अस्पतालले ३० दिनभित्र निर्णय गर्नुपर्छ र निर्णय लिखित रूपमा दिनुपर्छ। आर्थिक सहायता अस्वीकार गरिएमा वा आफूले पाएको छुट पर्याप्त नभएको लागेमा बिरामीले निर्णयविरुद्ध अपिल गर्न सक्छन्।
आर्थिक सहायता पाउन योग्य बिरामीलाई मासिक किस्तामा भुक्तानी गर्ने सुविधा दिनुपर्छ। मासिक किस्ता बिरामीको कर कटौती हुनुअघिको मासिक आम्दानीको ५ प्रतिशतभन्दा बढी हुन पाउँदैन। किस्ता योजनामा वार्षिक २ प्रतिशतभन्दा बढी ब्याज पनि लिन पाइँदैन।
ऋण असुलीमा प्रतिबन्ध
आर्थिक सहायता आवेदनको समीक्षा भइरहेको अवस्थामा अस्पतालले बिल ऋण असुली गर्ने कम्पनी वा एजेन्सीलाई पठाउन पाउँदैन। बिरामीले आर्थिक सहायताका लागि आवेदन नै नदिएको भए पनि अस्पतालले पहिलो बिल पठाएको कम्तीमा ६ महिनासम्म बिल ऋण असुली गर्ने निकायलाई पठाउन पाउँदैन।
अस्पतालले आर्थिक सहायता उपलब्ध नगराएको, आवेदन अनुचित रूपमा अस्वीकार गरेको वा बिल गैरकानुनी रूपमा ऋण असुली प्रक्रियामा पठाएको विश्वास भएमा जेम्सले न्युयोर्कवासीलाई महान्यायाधिवक्ताको कार्यालयको हेल्थ केयर हेल्पलाइन मा सम्पर्क गर्न आग्रह गरेकी छन्। हेल्पलाइनको फोन नम्बर १-८००-४२८-९०७१ हो।
एस्सेन्सियल प्लानमा परिवर्तन
संघीय स्वास्थ्य सेवा बजेट कटौतीका कारण न्युयोर्कको एस्सेन्सियल प्लानमा योग्यतासम्बन्धी नियम परिवर्तन भइरहेका बेला महान्यायाधिवक्ताको यो नयाँ मार्गदर्शन आएको हो। यसअघि महान्यायाधिवक्ताको कार्यालयले जारी गरेको सूचनाअनुसार, जुलाई १, २०२६ देखि एस्सेन्सियल प्लानका लागि आम्दानी सीमा संघीय गरिबी स्तरको २५० प्रतिशतबाट घटाएर २०० प्रतिशतमा कायम गरिएको छ।
यस परिवर्तनबाट पहिले शून्य-प्रिमियम स्वास्थ्य बीमा पाउँदै आएका करिब ४ लाख ५० हजार न्युयोर्कवासी प्रभावित हुने अपेक्षा गरिएको छ। उनीहरूले अब बढी प्रिमियम, डिडक्टिबल र आफ्नै खल्तीबाट तिर्नुपर्ने उपचार खर्च भएका बजारमा उपलब्ध स्वास्थ्य बीमा योजनातर्फ जानुपर्ने हुन सक्छ।
महान्यायाधिवक्ताको कार्यालयले एस्सेन्सियल प्लानको सुविधा गुमाउने वा स्वास्थ्य बीमामा अन्तराल हुने बासिन्दाका लागि अस्पतालको आर्थिक सहायता महत्वपूर्ण सुरक्षा कवच बन्न सक्ने जनाएको छ। एस्सेन्सियल प्लानको सुविधा गुमाउने न्युयोर्कवासीले न्युयोर्क स्टेट अफ हेल्थको बजारमार्फत विशेष नामांकन अवधिमा स्वास्थ्य बीमाका लागि आवेदन दिन सक्नेछन्। यो विशेष नामांकन अवधि सेप्टेम्बर १, २०२६ सम्म रहनेछ।
जेम्सको कार्यालयका अनुसार नयाँ मार्गदर्शन स्वास्थ्य उपचारको लागत घटाउने कार्यालयको व्यापक प्रयासको हिस्सा हो। कार्यालयले सन् २०२५ मा आफ्नो हेल्थ केयर हेल्पलाइनमार्फत न्युयोर्कवासीका लागि १५ लाख डलरभन्दा बढी रकम फिर्ता वा बचत गराएको जनाएको छ। स्वास्थ्य बीमाको बिलिङ, मानसिक स्वास्थ्य सेवामा पहुँच र अस्पताल उपचारसम्बन्धी विषयमा कार्यालयले विभिन्न सम्झौता तथा कानुनी कार्यवाहीसमेत अघि बढाएको छ।
महान्यायाधिवक्ताको मार्गदर्शनले न्युयोर्कवासीलाई अस्पतालका आर्थिक सहायता कार्यालय, बिरामीका अधिकारका लागि काम गर्ने प्रतिनिधि, सामाजिक कार्यकर्ता तथा चिकित्सा बिल तिर्न सहयोग गर्ने सामुदायिक संस्थाबाट सहायता लिन पनि आग्रह गरेको छ। मार्गदर्शनमा आफू सबै योग्यता पूरा गर्छु कि गर्दिनँ भन्नेमा निश्चित नभए पनि आर्थिक सहायताका लागि आवेदन दिन बिरामीलाई आग्रह गरिएको छ, किनकि अस्पतालले अन्य छुट वा सहायता पनि उपलब्ध गराउन सक्नेछन्।