अमेरिकी दूतावासहरूमा ७५० डलर थपेर चाँडो भिसा अन्तर्वार्ता पाइने पाइलट कार्यक्रम विस्तार
प्रकाशित मिति : ३ भदौ २०८३, बुधबार
क्यानडाको ओटावास्थित अमेरिकी दूतावासको मुख्य प्रवेशद्वार। अमेरिकी विदेश मन्त्रालयले बी-१/बी-२ भिसाका लागि सुरु गरेको द्रुत अन्तर्वार्ता पाइलट कार्यक्रममा क्यानडा पनि थपिएको छ। (फोटो: हेडेन सोलोभिएभ / विकिपिडिया / CC BY 4.0)
अमेरिकी विदेश मन्त्रालयले केही बी–१/बी–२ गैरआप्रवासी भिसा आवेदकलाई अतिरिक्त ७५० अमेरिकी डलर शुल्क तिरेर १० दिनभित्र अन्तर्वार्ताको मिति लिन सक्ने पाइलट कार्यक्रम थप देशमा विस्तार गरेको छ। यो सुविधा उपलब्धता र सम्बन्धित अमेरिकी कन्सुलर कार्यालयले छुट्याएका सीमित स्थानमा निर्भर हुनेछ।
अगस्ट १८ देखि लागू भएको विस्तारअन्तर्गत क्यानडा, कोलम्बिया, ग्वाटेमाला, कोस्टारिका र होन्डुरसस्थित अमेरिकी कन्सुलर कार्यालयहरूलाई कार्यक्रममा समावेश गरिएको छ। यसअघि जुलाई २१ मा मेक्सिको सिटीस्थित अमेरिकी दूतावास र मेक्सिकोभरिका अमेरिकी कन्सुलेटहरूबाट यो स्वैच्छिक कार्यक्रम सुरु गरिएको थियो। पाइलट कार्यक्रम डिसेम्बर ३१, २०२६ सम्म सञ्चालन हुने तय गरिएको छ।
व्यवसाय वा पर्यटनका लागि बी–१/बी–२ भिसा लिन चाहने आवेदकले सुरुमा नियमित १८५ अमेरिकी डलर गैरआप्रवासी भिसा आवेदन शुल्क तिर्नुपर्छ र नियमित अन्तर्वार्ताको मिति लिनुपर्छ। भविष्यको अन्तर्वार्ता मिति तय भइसकेको र एमआरभी शुल्कको रसिद म्याद नसकिएको अवस्थामा सम्बन्धित कन्सुलर कार्यालयमा सुविधा उपलब्ध भए र स्थान खाली भएमा आवेदकले “पेड एक्सपेडाइट” विकल्प रोज्न सक्नेछन्।
७५० अमेरिकी डलर शुल्क प्रत्येक आवेदकका लागि छुट्टै लाग्नेछ। यो नियमित भिसा आवेदन शुल्कभन्दा अतिरिक्त हो। कन्सुलर कार्यालयहरूले प्रत्येक दिन सीमित संख्यामा छिटो अन्तर्वार्ताका लागि समय उपलब्ध गराउनेछन्।
आवेदकले छिटो अन्तर्वार्ताको समय छनोट गरेपछि उक्त स्थान सुरक्षित गर्न १० मिनेटभित्र ७५० डलर शुल्कको भुक्तानी पूरा गर्नुपर्ने विदेश मन्त्रालयले जनाएको छ। यस्तो अन्तर्वार्ता मिति परिवर्तन वा पुनःनिर्धारण गर्न पाइने छैन। आवेदक अन्तर्वार्तामा उपस्थित नभएमा वा अन्तर्वार्ता रद्द गरेमा ७५० डलर शुल्क फिर्ता हुने छैन।
यो कार्यक्रमले भिसा अन्तर्वार्ताको मिति मात्र अगाडि सार्ने हो। यसले भिसा आवेदनको निर्णय छिटो हुने वा भिसा स्वीकृत हुने कुनै ग्यारेन्टी गर्दैन। छिटो अन्तर्वार्ताका लागि शुल्क तिरेका आवेदकले पनि अन्य सबै अमेरिकी भिसा आवेदकसरह सुरक्षा जाँच, पृष्ठभूमि परीक्षण तथा योग्यता मूल्यांकनको प्रक्रियाबाट गुज्रनुपर्नेछ।
विदेश मन्त्रालयका अनुसार छिटो अन्तर्वार्ताका लागि शुल्क तिरेका आवेदकले उपलब्ध भएमा थप शुल्क नतिरी प्रिमियम पासपोर्ट डेलिभरी विकल्प पनि छनोट गर्न सक्नेछन्।
कार्यक्रममा क्यानडास्थित अमेरिकी दूतावास र सबै अमेरिकी कन्सुलेटहरू, कोलम्बियाको बोगोटास्थित अमेरिकी दूतावास, ग्वाटेमाला सिटीस्थित अमेरिकी दूतावास, कोस्टारिकाको सान होसेस्थित अमेरिकी दूतावास, होन्डुरसको तेगुसिगाल्पास्थित अमेरिकी दूतावास तथा मेक्सिकोस्थित अमेरिकी दूतावास र कन्सुलेटहरू सहभागी छन्।
यो शुल्क तिरेर छिटो अन्तर्वार्ता लिने सुविधा भविष्यको अन्तर्वार्ता मिति तय भइसकेका बी–१/बी–२ भिसा आवेदकका लागि मात्र सीमित छ। अन्तर्वार्ता छुट अर्थात् इन्टरभ्यु वेभरका लागि योग्य भई भिसा नवीकरण गर्न चाहने आवेदकलाई यो सुविधा उपलब्ध नहुने विदेश मन्त्रालयले जनाएको छ।
नियमित आपत्कालीन भ्रमण भिसाको अन्तर्वार्ता छिटो गराउन गरिएको अनुरोध अस्वीकृत भएका आवेदकले पनि अन्य योग्यता पूरा गरेमा ७५० डलर तिरेर उपलब्ध छिटो अन्तर्वार्ता विकल्प प्रयोग गर्न सक्नेछन्। समूहमा आवेदन दिने प्रत्येक सदस्यले छिटो अन्तर्वार्ता लिन चाहेमा छुट्टाछुट्टै ७५० डलर शुल्क तिर्नुपर्नेछ।
विदेश मन्त्रालयले पाइलट कार्यक्रम सञ्चालन हुने अवधिमा थप अमेरिकी कन्सुलर कार्यालयलाई पनि यस कार्यक्रममा समावेश गर्न सकिने जनाएको छ।