न्यू जर्सीका विवादित पूर्व न्यायाधीश अब आप्रवासी अदालतको बेन्चमा, वकिलहरूद्वारा चिन्ता व्यक्त
प्रकाशित मिति : २२ असार २०८३, सोमबार
फोटो : टिन्गी इन्जुरी ल फर्म
जबरजस्ती करणीको आरोप लगाउने एक महिलाप्रति असंवेदनशील टिप्पणी गरेबापत भर्खरै आलोचित बनेका न्यू जर्सीका पूर्व न्यायाधीश थोमस शुस्टेडले अब आप्रवासी अदालतको जिम्मेवारी पाएका छन्।
नयाँ नियुक्तिसँगै उनले हिरासतमा रहेका आप्रवासीहरूको देश निकाला सम्बन्धी मामिला र धरौटीको निर्णय गर्नेछन्। यी आप्रवासीहरूमा घरेलु हिंसा र यौन दुर्व्यवहारबाट पीडित भएकाहरू समेत सामेल छन्।
यो खबर सार्वजनिक भएपछि आप्रवासीका कानुन व्यवसायीहरू निकै चिन्तित बनेका छन्। न्यू जर्सीको आप्रवासी अदालतमा पहिले नै धरौटी पाउन गाह्रो भइरहेको अवस्थामा विवादित न्यायाधीशको आगमनले स्थिति अझ बिगार्ने उनीहरूको भनाइ छ।
फिलाडेल्फियाकी आप्रवासी वकिल एड्रियाना मिचेलले न्यायाधीश शुस्टेडको सुरुवाती दिनमै उनको इजलासमा बहस गरेकी थिइन्। उनले शुस्टेडलाई घरेलु हिंसा वा मानव बेचबिखनका पीडितहरूको शरणार्थी मुद्दाबाट अलग राख्न माग गर्दै उजुरी दिने तयारी गरेकी छन्।
वकिल मिचेलका अनुसार, शुस्टेडले आफ्नो पहिलो दिनमै इजलासमा रहेका हरेक आप्रवासीको धरौटी अस्वीकार गरेका थिए। जसमा कुनै आपराधिक इतिहास नभएका र अमेरिकी नागरिकसँग विवाह गरेका एक डोमिनिकन पुरुष समेत थिए।
न्यायाधीश शुस्टेडको यो नियुक्ति, न्यू जर्सीको पुनरावेदन अदालतले उनको कडा आलोचना गरेको ठीक दुई हप्तापछि ट्रम्प प्रशासनद्वारा गरिएको हो।
यसअघि, सन् २०२५ मा एक कलेज छात्राले आफूलाई बलात्कार गर्ने पुरुषविरुद्ध सुरक्षात्मक आदेश माग गर्दा शुस्टेडले ती महिलाको कुरा विश्वासिलो भए पनि आदेश दिन अस्वीकार गरेका थिए।
त्यति मात्र नभई, शुस्टेडले आरोपी पुरुषलाई महिलाकै अगाडि तपाईंले आज कत्रो छुट पाउनुभयो, बुझ्नुभयो? भन्दै टिप्पणी गरेका थिए। पुनरावेदन अदालतले उक्त निर्णय उल्ट्याउँदै शुस्टेडको व्यवहार यौन हिंसा पीडितप्रति निष्पक्ष र सम्मानजनक नरहेको ठहर गरेको थियो।
अर्की आप्रवासी वकिल लरेन एन्सेलोविट्जका अनुसार, पुनरावेदन अदालतको फैसला शुस्टेडको नियुक्ति हुनुभन्दा दुई हप्ताअघि मात्र आएकाले अमेरिकी जस्टिस डिपार्टमेन्टलाई उनको यो विवादबारे जानकारी नभएको हुन सक्छ।