अमेरिकामा स्थानीय प्रहरीलाई नागरिकको अनुहार स्क्यान गर्ने ‘एप’ दिने आइसको तयारी
प्रकाशित मिति : ५ असार २०८३, शुक्रबार
Photo: Redd Francisco / Unsplash
सङ्घीय अध्यागमन अधिकारीहरूले प्रयोग गर्ने अनुहार चिन्न सक्ने प्रविधि अब स्थानीय प्रहरीलाई पनि उपलब्ध गराइने भएको छ। डिपार्टमेन्ट अफ होमल्यान्ड सेक्युरिटीको हालै सार्वजनिक एक प्रतिवेदनले यो योजना खुलासा गरेको हो।
यो खुलासा ‘४०४ मिडिया’ नामक प्रविधि समाचार पोर्टलले सार्वजनिक गरेको ‘गोपनीयता सीमा विश्लेषण’ प्रतिवेदनमार्फत भएको हो। प्रतिवेदनका अनुसार स्थानीय प्रहरीका लागि ‘आइस टास्क फोर्स मोड्युल‘ नामक मोबाइल एप विकास गरिएको छ ।
यस एपको मद्दतले प्रहरीले सडकमा रोकेका जुनसुकै व्यक्तिको पनि अनुहार स्क्यान गर्न सक्नेछन् । स्क्यान गरिएको फोटोलाई सरकारको २५ करोडभन्दा बढी डेटाबेस (जस्तै: भिसा रेकर्ड र विमानस्थलको यात्रु विवरण) सँग तुरुन्तै तुलना गरिन्छ ।
अनुहार जाँच गरेपछि एपले प्रहरीलाई दुईवटा मध्ये एउटा निर्देशन दिन्छ: कि त “पक्राउ नगर्नू“ भन्छ, कि त थप जानकारीका लागि आइससँग सम्पर्क गर्न एउटा ‘रेफरेन्स कोड’ उपलब्ध गराउँछ। यसरी खिचिएका फोटोहरू सरकारी प्रणालीमा १५ वर्षसम्म सुरक्षित राखिनेछ ।
कानुन र नागरिक अधिकार विज्ञहरूले यस प्रविधिको तीव्र आलोचना गरेका छन् । प्रहरीले बिनाकुनै ठोस शङ्का बाटामा हिँडिरहेका जोकोहीको फोटो खिचेर यसको दुरुपयोग गर्न सक्ने र यसले नागरिकको स्वतन्त्रतामाथि गम्भीर प्रहार गर्ने उनीहरूको तर्क छ ।
विज्ञहरूका अनुसार यस प्रविधिको चपेटामा सर्वसाधारण अमेरिकी नागरिकहरू पनि पर्ने निश्चित छ, किनकि प्रहरीले अनुहार स्क्यान गर्नुअघि उक्त व्यक्तिको नागरिकता थाहा पाउँदैन । यसलाई डिजिटल अधिकारवादीहरूले आधुनिक युगको तानाशाही निगरानी शैलीको रूपमा लिएका छन् ।
यद्यपि, होमल्यान्ड सेक्युरिटीले आफ्नो बचाउ गर्दै नागरिकको स्वतन्त्रता र गोपनीयताको सम्मान गर्दै सुरक्षा र आपराधिक क्रियाकलाप रोक्न मात्र यस संवैधानिक प्रविधिको प्रयोग गरिने दाबी गरेको छ।