होमल्याण्ड सेक्युरिटीको बजेट गतिरोध अन्त्य हुने संकेत, अध्यागमन एजेन्सीमा नयाँ अंकुशको तयारी
प्रकाशित मिति : १० चैत्र २०८२, मंगलबार
डिएचएस फोटो: सिड्नी फिनिक्स
अमेरिकी होमल्याण्ड सेक्युरिटीको बजेटलाई लिएर लामो समयदेखि जारी राजनीतिक गतिरोध अन्त्य हुने संकेत देखिएको छ। सिनेटका सदस्यहरूले एउटा नयाँ प्रस्तावमा छलफल गरिरहेका छन्, जसअन्तर्गत यातायात सुरक्षा प्रशासनका कर्मचारीहरूको रोकिएको पारिश्रमिक भुक्तानी गर्ने र विभागका धेरैजसो निकायलाई बजेट उपलब्ध गराउने तयारी गरिएको छ। यद्यपि, यो सहमतिमा राष्ट्रपति डोनाल्ड ट्रम्पको ‘डिपोर्टेसन एजेन्डा’ को मुख्य हिस्सा मानिने आइसको ‘इन्फोर्समेन्ट एण्ड रिमुभल अपरेसन’ लाई भने हाललाई बजेटबाट बाहिर राखिएको छ।
सोमबार राति रिपब्लिकन सिनेटरहरूको एक समूहले ह्वाइट हाउसमा राष्ट्रपति ट्रम्पसँग भेट गरेपछि यो सम्भावित सहमति बनेको हो। छलफल सकारात्मक र फलदायी रहेको बताउँदै सिनेट बहुमत नेता जोन थुनले वार्ता सही दिशामा अघि बढिरहेको जानकारी दिएका छन्। दुवै पक्षका वार्ताकारहरूले रातभर काम गरेर तयार पारेको लिखित प्रस्ताव मंगलबार आ-आफ्नो पार्टीको साप्ताहिक ‘ककस लन्च’ मा प्रस्तुत गर्ने अपेक्षा गरिएको छ। डेमोक्र्याटिक नेता चक शुमरले पनि दुवै पक्ष गम्भीरताका साथ काम गरिरहेको पुष्टि गरेका छन्।
यो संवैधानिक र बजेटरी संकटका कारण अमेरिकी विमानस्थलहरूमा सुरक्षाकर्मीको अभाव हुँदा यात्रीहरूले निकै सास्ती भोग्नु परिरहेको छ। मिनियापोलिसमा आइस विरोधी प्रदर्शनका क्रममा दुई अमेरिकी नागरिकको मृत्यु भएपछि डेमोक्र्याटहरूले ट्रम्पको अध्यागमन प्रवर्तन र सामूहिक देश निकाला गर्ने अभियानमा कडा अंकुश लगाउनुपर्ने माग राख्दै आएका छन्। नयाँ प्रस्ताव अनुसार, अध्यागमन अधिकारीहरूले अनिवार्य रूपमा बडी क्यामेरा लगाउनुपर्ने र घर खानतलासी गर्दा अदालतको वारेन्ट चाहिने जस्ता सर्तहरू समावेश गरिनु पर्ने डेमोक्र्याटहरूको अडान छ।
यसैबीच, सिनेटले सोमबार राति मार्कवेन मुलिनलाई नयाँ होमल्याण्ड सेक्युरिटी सेक्रेटरीका रूपमा अनुमोदन गरेको छ। उनले क्रिस्टी नोमको स्थान लिनेछन्, जसको कार्यकालमा अध्यागमन प्रवर्तनलाई लिएर ठूलो सार्वजनिक आक्रोश र बजेट विवाद चर्किएको थियो। नयाँ नेतृत्व र प्रस्तावित बजेटरी सम्झौताले विमानस्थलको सुरक्षा व्यवस्था सहज पार्ने र अध्यागमन अपरेसनमा नयाँ नियमहरू लागू गर्ने आशा गरिएको छ।