भेनेजुएलामा अमेरिकी हस्तक्षेपपछि बोल्यो नेपाल, संयमता अपनाउन सबै पक्षलाई आग्रह
प्रकाशित मिति : पुस २३, २०८२ बिहीबार
नेपाल सरकारले भेनेजुएलामा विकसित हालैका राजनीतिक तथा सुरक्षा सम्बन्धी घटनाक्रमलाई नजिकबाट नियालिरहेको जनाएको छ । परराष्ट्र मन्त्रालयले एक विज्ञप्ती जारी गर्दै सम्बन्धित सबै पक्षलाई अधिकतम संयम अपनाउन र तनाव बढाउने कुनै पनि गतिविधिबाट टाढा रहन आग्रह गरेको हो ।
विज्ञप्तिमा नेपालले संयुक्त राष्ट्र संघको बडापत्रमा उल्लेखित सार्वभौमसत्ता, क्षेत्रीय अखण्डता तथा राज्यहरूको राजनीतिक स्वतन्त्रताको सिद्धान्तप्रति पूर्ण सम्मान हुनुपर्ने कुरामा जोड दिएको छ । अन्तर्राष्ट्रिय सम्बन्धमा यी आधारभूत मान्यताहरूको पालना शान्ति, स्थायित्व र सहअस्तित्वका लागि अपरिहार्य रहेको मन्त्रालयले विज्ञप्तीमा उल्लेख गरेको छ । विज्ञप्तीमा भनिएको छ, ‘नेपालले संयुक्त राष्ट्र संघको बडापत्रमा उल्लेखित सार्वभौमसत्ता, क्षेत्रीय अखण्डता र राज्यहरूको राजनीतिक स्वतन्त्रताको सिद्धान्तहरूको पूर्ण सम्मान गर्ने महत्वलाई जोड दिन्छ ।’
नेपालले भेनेजुएलामा देखिएका मतभेद तथा विवादहरूलाई संवाद, कूटनीति र आपसी समझदारीमार्फत शान्तिपूर्ण ढङ्गले समाधान गरिनुपर्ने धारणा पनि सार्वजनिक गरेको छ । समस्याको समाधानका लागि वार्ता र कूटनीतिक माध्यम नै दिगो र प्रभावकारी विकल्प हुने भन्दै नेपालले सबै पक्षलाई जिम्मेवार व्यवहार गर्न आह्वान गरेको छ ।
अमेरिकी सेनाले गत शनिवार भेनेजुएलामा आक्रमण गरी राष्ट्रपति निकोलस मादुरो दम्पतीलाई पक्राउ गरेर न्यूयोर्क पु¥याएको थियो । मादुरो सोमबार पहिलो पटक न्यूयोर्कको अदालतमा उपस्थित भएका थिए ।
खुट्टामा साङ्लो बाँधिएको अवस्थामा इजलासमा प्रवेश गरेका मादुरोले आफूलाई अमेरिकी सेनाले “अपहरण” गरेको दाबी गर्दै आफू एक “युद्ध बन्दी” भएको बताएका थिए । उनले न्यायाधीश एल्भिन हेलस्र्टाइनको अगाडि आफूलाई जनवरी ३ मा भेनेजुएलाको काराकासस्थित आफ्नै निवासबाट जबरजस्ती कब्जामा लिइएको बयान दिएका थिए । मादुरोमाथि अमेरिकामा नार्को–आतङ्कवादसहित चार वटा आपराधिक अभियोग लगाइएको छ।