क्याम्प पेन्डलटनमा प्रशिक्षणको क्रममा सवारी दुर्घटना हुँदा एक अमेरिकी मरीनको मृत्यु
प्रकाशित मिति : मंसिर १८, २०८२ बिहीबार
अमेरिकाको साउदर्न क्यालिफोर्नियामा प्रशिक्षण अभ्यासको क्रममा एक अमेरिकी मरीनको निधन भएको छ । मरीन कर्प्सका अनुसार स्थानीय समयअनुसार बुधबार दिउँसो क्याम्प पेन्डलटनमा दैनिक प्रशिक्षणको क्रममा ट्याक्टिकल भेइकल दुर्घटनामा परी मरीनको मृत्यु भएको हे । उनी एक्सपेडिशनरी फोर्समा आबद्ध थिए ।
घटनाको कारणबारे अनुसन्धान भइरहेको बताइएको छ । यस्तै, पीडितको पहिचान परिवारलाई सूचित गरिएको २४ घण्टापछि मात्र सार्वजनिक गरिनेछ।
सान डिएगो यूनियन(ट्रिब्युनका अनुसार डिसेम्बर ३ मा क्याम्प पेन्डलटनको मरीन एक्सपेडिशनरी फोर्सको नेतृत्वमा क्यालिफोर्निया र एरिजोनाका हजारौं मरीन सहभागी भएर दुई हप्ते ठूलो प्रशिक्षण अभ्यास सुरु भएको थियो। मृतक मरीनले उक्त अभ्यासमा भाग लिएका थिए कि थिएनन् भन्ने हालसम्म स्पष्ट छैन।
क्याम्प पेन्डलटन सान डिएगोबाट करिब ४० माइल उत्तरमा अवस्थित छ। यो घटना करिब दुई वर्षअघि त्यही सैनिक अड्डामा भएको अर्को दुर्घटनासँग मेल खान्छ, जहाँ अर्को अमेरिकी मरीनको मृत्यु भएको थियो भने दर्जनौं घाइते भएका थिए। सो बेला एन्फिबियस कम्याट भेइकल पल्टिँदा दुर्घटना भएको थियो।
