डिभी विजेताले भिसा पाउन २ साता बाँकी, काठमाडौं दूतावासको भिसा सेवा बन्द हुँदा अन्यौल
प्रकाशित मिति : भाद्र २९, २०८२ सोमबार
अब डिभी २०२५ का विजेताहरुले भिसा पाउनुपर्ने अवधि जम्मा २ सातामात्र बाँकी रहेको छ । डिभी २०२५ का विजेताहरुले सेप्टेम्बर ३० भित्र भिसा नपाएको खण्डमा उनीहरु यो बर्षका लागि डिभीका लागि अयोग्य हुनेछन् । अर्थात् अक्टोबर १ देखि डिभी २०२६ का विजेताहरुले भिसा पाउन सुरु गर्नेछन् । तर नेपालको पछिल्लो प्रदर्शन र हिंशाका कारण अमेरिकी दूतावास काठमाडौंले साताका सबै भिसा अपोइन्टमेन्टहरूको समय तालिका परिबर्तन गरेपछि डिभी विजेताहरुमा भिसा नपाइने चिन्ता देखिएको छ ।
एक डिभी विजेताले इमेलमार्फत खसोखाससँग भने -“भिसा पाउने अवधि निकै थोरैमात्र रहेकाले भिसा पाइने हो कि होइन भन्ने चिन्ताले पिरोलेको छ ।” यसबारे अन्य कैयन डिभी विजेताहरुले पनि खसोखाससँग अन्यौल व्यक्त गरेका थिए ।
गतसाता अपोइन्टमेन्ट स्थगित भएका डिभी विजेताहरुले नयाँ अप्वाइन्टमेन्ट प्राप्त गरिसके नसकेको प्रष्ट छैन । यदि उनीहरुले सेप्टेम्बर ३० अगाडि अप्वाइन्टमेन्ट प्राप्त गरेर भिसा नपाएको खण्डमा उनीहरुको २०२५ को डिभीमार्फत अमेरिका आउने सपना समाप्त हुनेछ । यसबारे अमेरिकी दूतावास काठमाडौंले पनि केही बताएको छैन । डिभीवाहके अन्य भिसाका आवेदकहरुका लागि भने अप्वाइन्टमेन्ट सेप्टेम्बर ३० पछि उपलब्ध गराइएको खण्डमा समेत कुनै असर पर्नेछैन । परिवार र रोजगारमा आधारित आप्रवासी भिसा आवेदकहरु आर्थिक बर्ष २०२६ मा पनि आप्रवासी भिसाका लागि योग्य हुनसक्नेछन् ।
सेप्टेम्बर ३० मा समाप्त हुने चालु आर्थिक बर्ष २०२५ का लागि १४ हजार ४ सय ५० सम्म केस नम्बर हुने नेपाली डिभी विजेताहरुमात्र योग्य छन् । अर्थात् यो बर्ष १४ हजार ४ सय ५० भन्दा बढी केस नम्बर हुने नेपाली डिभी विजेताले भिसा पाउनेछैनन् । २०२४ भन्दा अगाडिका बर्षहरुमा सामान्यतया अगस्त र सेप्टेम्बर महिनाका लागि सबै डिभी विजेता नेपालीहरुको केस नम्बर करेन्ट हुने वा केस नम्बरको सिमाबन्दी कममात्र रहने गरेको थियो भने गतबर्ष १३ हजारसम्म केसको सिमाबन्दी थियो ।
चालु आर्थिक बर्षका लागि ३८६१ जना नेपाली डिभी लोटरीमा छनौट भएका छन् । डिभी लोटरीमा छनौट हुनेमा नेपालीहरु एसियामा तेश्रो नम्बरमा छन् । पहिलो नम्बरमा इरानका ५२६७ जनाले डिभी पारेका छन् भने दोश्रो नम्बरमा अफगानिस्तानका ४ हजार ९ जनाले डिभी पारेका छन् । युरोपमा सबैभन्दा धेरै उज्वेकिस्तानका ५५६४, दोश्रोमा टर्कीका ४१९४ र तेश्रोमा युक्रेनका ४००२ जनाले डिभी पारेका छन् । दक्षिण अमेरिकामा क्युबाका २३४८ जनाले डिभी पारेका छन् । अफ्रिकामा अल्जेरियाका ५५२६, इजिप्टका ५५१५, सुडानका ५५०५ र केन्याका ४४५९ जनाले डिभी पारेका छन् ।
५५ हजारले भिसा पाउने भएतापनि कुल १ लाख ३१ हजार ६० जनाले विश्वभरबाट डिभी पारेका छन् । विश्वभरबाट १ करोड ९९ लाख २७ हजार ६ सय ५६ जनाले डिभीका लागि आवेदन दिएका थिए ।
अमेरिकी संससदको कार्यादेश प्राप्त डाइभर्सिटी आप्रवासी भिसा कार्यक्रम अमेरिकी विदेश मन्त्रालयले वार्षिक रूपमा सञ्चालन गर्दछ । आप्रवासन तथा राष्ट्रियतासम्बन्धी ऐनको दफा २०३ सीले ऐतिहासिक रूपमा कम दरमा अमेरिका आप्रवासन गर्ने देशका व्यक्तिहरूलाई डाइभर्सिटी आप्रवासीका रूपमा एक वर्गको हैसियत प्रदान गर्ने व्यवस्था गरेको छ ।
डिभी पर्ने आवेदकहरूले डिभी कार्यक्रमका लागि योग्य हुनका निम्ति सरल तर कडा योग्यताका मापदण्डहरू पूरा गर्नुपर्छ । भिसाहरू छ भौगोलिक क्षेत्रमा वितरण गरिन्छ र हरेक क्षेत्रमा कुनै पनि एक देशले कुनै पनि एक वर्षमा उपलब्ध हुने डिभीको सात प्रतिशत सङ्ख्याभन्दा बढी भिसा प्राप्त गर्ने छैन ।